რატომ აუქმებს პრეზიდენტი ყველა საახალწლო ღონისძიებას და ვინ არის მისი “ლოგისტიკური სირთულე”

პრეზიდენტის ადმინისტრაციამ ორბელიანების სასახლესთან,  “ლოგისტიკური სირთულეების გამო”,  ახალ წლამდე დაგეგმილი ყველა ოფიციალური ღონისძიება გააუქმა:

“ორბელიანების სასახლის მიმდებარე ტერიტორიაზე შექმნილი ლოგისტიკური სირთულეების გამო, საქართველოს პრეზიდენტის ადმინისტრაცია აუქმებს ახალ წლამდე დაგეგმილ ყველა ოფიციალური ღონისძიებას, მათ შორის  საქართველოს ეროვნული და ვაჟა-ფშაველას სახელობის პრემიების 2022 წლის ლაურეატების დაჯილდოების სახელმწიფო ცერემონიას.
აღნიშნული ღონისძიებების გამართვის დრო საზოგადოებას დამატებით ეცნობება,” – ნათქვამია პრეზიდენტის ადმინისტრაციის განცხადებაში.

შეგახსენებთ, ათონელის რეზიდენციასთან, მიხეილ სააკაშვილის გადარჩენისა და შეწყალების მოთხოვნით უწყვეტი პროტესტი 23 დეკემბრიდან დაიწყო. მონაწილეები სალომე ზურაბიშვილს მოუწოდებენ, შეიწყალოს მესამე პრეზიდენტი იმისთვის, რომ მას საზღვარგარეთ მკურნალობის საშუალება მიეცეს. აქციის მონაწილეები ორბელიანების სასახლესთან ღამეებს ათევენ.

გიორგი მუმლაძე, ნაციონალური მოძრაობის თავმჯდომარეობის კანდიდატი, გუშინ საღამოს წერდა:

“მთელი ქუჩაა განათებული ათონელზე, მხოლოდ ჩვენი აქციის თავზე ჩააქრეს ლამპიონი.

მანამდე პოლიცია დასდევდა დასაკეც სკამს და პლედებს

ბოროტ ქოცი, რისი ბოროტი ქოცია?!

დისკომფორტს უქმნით ჩვენი აქ დგომა, მოუწევთ აგვიტანონ

#თავისუფლებამიშას”