რატომ არ ახსენებს „ოცნება“ გიორგი კვირიკაშვილს? – „ის, პრაქტიკულად, ერთადერთი წასულია, ვისზეც დუმილია გამოცხადებული“

ანი დვალიშვილი

თუ გახსოვთ, ადრე დავწერეთ, მმართველი გუნდი სოსო გოგაშვილს ან გააჩუმებს, ან გააკულაკებს თქო. გოგაშვილი არ გაჩუმდა და მიიღო ის, რაც დავაანონსეთ – მის ქონებას ყადაღა დაედო, მაგრამ გვერწმუნეთ, ეს ყველაფერი არ არის. საგამოძიებო უწყება კვლავ აგრძელებს ძიებას და არც თუ შორეულ მომავალში, გოგაშვილს აუცილებლად უპოვნიან ქონებას, რომელსაც ყადაღას დაადებენ. საერთო ჯამში, თანხა ათეულ მილიონობით ლარს ურტყამს და დაკავებულს იმის ახსნაც მოუწევს, საიდან და როგორ დააგროვა ეს ყველაფერი. მართალია, მისი მეუღლე ამტკიცებს, ყველაფერი კრედიტით შევიძინეთო, მაგრამ სუს-ის მაღალჩინოსნის მიერ ბოლოს შევსებულ დეკლარაციას თუ გადავხედავთ, სესხი 150 ათასი დოლარიც კი არ არის, დაყადაღებული ქონება კი მილიონობით… დოლარია… კიდევ გავიმეორებთ იმას, რაც ადრე დავწერეთ – გოგაშვილის სასამართლო არის მაგალითი „ოცნების“ იმ წევრებისთვის, ვინც გადაწყვეტს, რომ გუნდის წინააღმდეგ წავიდეს. თუ აკვირდებით, ერთადერთი, ვისზეც „ოცნება“ ხმას არ იღებს, ყოფილი პრემიერი, გიორგი კვირიკაშვილია. რატომ? ზუსტად იმავე მიზეზით – ხმას არც კვირიკაშვილი იღებს, თორემ აგერ არის კახეთი და მიწები, რომლების მისი ოჯახის საკუთრებაა და სადაც მარცვლეული კულტურები ითესება.

რაც შეეხება რუსეთიდან გამოქცეულ ახალგაზრდებს… მათი აბსოლუტური უმრავლესობა ჩვეულებრივი დეზერტირია, მაგრამ ტყუილია ის, რომ აქ მხოლოდ რუსეთის მოქალაქეები გამორბიან. თავად განსაჯეთ, რუსეთის ტერიტორიაზე საქართველოს 800 ათასი მოქალაქე ცხოვრობს, აქედან ყველას თუ არა, 300 ათასს მაინც რუსეთის მოქლაქეობა დიდი ხნის მიღებული აქვს და ჩვენი მონაცემებით, დაახლოებით 20 ათასამდე წვევამდელია. ჰოდა, ეს ადამიანებიც გამორბიან და უბრუნდებიან ისტორიულ სამშობლოს. ეს დამატებით უმუშევართა არმიაა ქვეყნისთვის, მაგრამ მათ უმრავლესობას საკმარისი დანაზოგი აქვს იმისთვის, რომ მცირე ბიზნესი დაიწყოს. რაც შეეხებათ უშუალოდ რუსებს…

„გვაქვს შესაძლებლობა, რომ საქართველოში 3-4 თვე ისე ვიცხოვროთ, სამსახური არ დაგვჭირდეს და ვიმედოვნებთ, რომ ამ ხნის განმავლობაში, ომი დასრულდება, რუსეთში ხელისუფლება შეიცვლება და დავბრუნდებით. ვიცით, რომ დეზერტირობის მუხლით შეიძლება გაგვასამართლონ, მაგრამ 5 წელი ციხეში ყოფნა ჯობს სასაკლაოზე წასვლას“, – ეს ერთ-ერთმა რუსმა გვითხრა, რომელიც საქართველოში ძმასთან ერთად ჩამოვიდა და გაოცებულია იმით, რომ თბილისში ბინის ქირაობას უბრალოდ, ვერ ახერხებს. მართლაც, ბინის ფასები არამარტო დედაქალაქში, არამედ რეგიონებშიც საგრძნობლად გაიზარდა და ტურისტებს ვინ ჩივის, რეგიონებიდან ჩამოსულ სტუდენტებს ძალიან სერიოზული პრობლემა ექმნებათ.

სხვათა შორის, რაც დღეს ხდება, ეკონომიკისთვის ძალიან კარგია, მოსახლეობისთვის – ცუდი, რადგან ბინების გარდა, პროდუქტზე ფასებიც ძვირდება და ეს ყველაფერი სწორედ რუსებზეა გათვლილი, მაგრამ პროდუქტის შეძენა ქართველებსაც უწევთ და შესაბამისად, ძვირის გადახდაც. გაძვირდა რესტორნის ფასებიც და ზოგადად, თუ ამ ტემპით გაგრძელდება, მალე რუსულ რელსებზე გადაეწყობა ჩვენი ეკონომიკა და ეს მაინცდამაინც კარგი არ უნდა იყოს – აქაური და რუსული შემოსავალი ერთმანეთისგან ძალიან განსხვავდება.