ექსპერტი, დავით ქართველიშვილი სოციალურ ქსელში წერს:
„პოლიტიკური ნიშნით საზოგადოების დაყოფა, ჩემი პირობითი გაანგარიშებით, დღეს მარტივი ფორმულით აისახება: ყოველ ორ ქ/ოცნების მომხრეზე, მოდის თითო-თითო – ნაცი და “არავისტი”. ჩვენ მშვიდობიანად თანავცხოვრობთ სოციუმში, ჩვენ საერთო საცობები გვაერთიანებს, ჩვენ დავდივართ ერთ მაღაზიებში, კლინიკებში, სტადიონებზე – ჩვენ ვცნობთ ერთმანეთს, მაგრამ ჩვენში ჯერ კიდევ შენარჩუნებული ქართველობისა და ქრისტიანული კულტურის ფარგლებში, წითელ ხაზებს არ გადავდივართ.
ჩამიარა სამედიცინო დაწესებულებაში დათო კირკიტაძემ – ვიცანი, მიცნო. ავუარეთ ერთმანეთს გვერდი, მისი არ ვიცი – მე ჩემთვის ჯანმრთელობა ვუსურვე. გამეხარდა, რომ გულწრფელად გამომივიდა. რასაც მე, ჩემს ზურგს უკან, სოციალურ ქსელებში მაგინებენ – წინაპრებიდან დაწყებული, შთამომავლებით დასრულებული, მათთან ერთად ვმოძრაობ რეალურ წუთისოფელში. დარწმუნებული ვარ, იმ ვირტუალურმა მაგინებელმა, შორიდან რომ მიცნოს სადმე “კარფურში”, მოერიდება თავისი ფბ-ს განზრახვების “ლაივში” განხორციელებას.
ოჯახის წევრებთან, სამეგობროსთანაც – დარწმუნებული ვარ იგივე ვითარებაა. გვყოფნის, ჯერ კიდევ გვყოფნის სიბრძნე, ქართველობა და ქრისტიანობა – გამოვიყენოთ რუბიკონების არგადალახვაში. ჩემი ოთხფეხა მეგობრების მსგავსად – ხეობაში გასეირნების შემდეგ, სახლისკენ დაბრუნებულებს, კარებთან არ მისული, ჩემებს სამეზობლოს ძაღლები ხვდებიან – ყნოსავენ ერთმანეთს, ეფერებიან, თამაშობენ, ურთიერთობენ. მაგრამ! როგორც კი საკუთარ დაცულ ტერიტორიაზე შევლენ – გამყოფ ღობესთან ისეთი ყეფა იწყება, ფბ-ზე რომ გვაქვს ხოლმე.
ასე რომ…მთლად ისეთი “დეპოლარიზაციაც” არ გვჭირს ალბათ, ბოლშევიკურ რუსეთში “წითლებსა” და “თეთრებს” რომ ჰქონდათ ერთმანეთთან, თუმცა ეს ფაზაც გავლილი გვაქვს ჩვენს უახლოეს ისტორიაში – უბრალოდ რაიმე საბედისწერო შეცდომების განმეორებისაგან გვაშოროს უფალმა. ანუ, ფბ-ზე მაგინეთ, არაა პრობლემა…“
კომენტარები