რას უნდა ველოდოთ, სააკაშვილის დაბრუნების შემთხვევაში? – “არ დაგვავიწყდეს, რომ მასწავლებელთა დიდი რიცხვი სააკაშვილის მოთაყვანე იყო…”

ექსპერტმა, ხათუნა ლაგაზიძემ „პალიტრანიუსის“ გადაცემა „ნიუსრუმში“ განაცხადა:

„ოცნება“ დგას იმ მოცემულობის წინაშე, რომ მაქსიმალურად გააყალბოს არჩევნები, ან ვერ გაბედოს იმ მასშტაბის გაყალბება, რასაც მიშას ჩამოუსვლელობის შემთხვევაში გაბედავდა. კალაძეს გადახტომა კარგად ეხერხება. თუ თავის დროზე სააკაშვილის მფარველობიდან ბიძინას ნავში გადახტა, რა დაუშლის, რომ უკან გადახტეს? ამის შანსები დამოკიდებულია იმაზე, თუ როგორი ფსიქოლოგიური გარემო დალაგდება.

ის ამომრჩეველი, რომელიც გახარიასკენ წავიდა და ეგონა, რომ სააკაშვილი საქართველოში არ დაბრუნდებოდა, გახარიასგან, შესაძლოა, ისევ „ოცნებისკენ“ წავიდეს. ეს არის „დამოკლეს მახვილი“ გახარიას თავზე. ამავდროულად, არ გამოვრიცხოთ „ოცნებიდან“ ამომრჩევლის იმ ნაწილის გადმოდენაც, რომელიც მათ მხოლოდ პირადი გამოჩენის მიზნით უჭერდა მხარს. ასეთი ადამიანები ღირებულებებით და იდეოლოგიით არ აკეთებს არჩევანს. თუ მათ დაინახეს, რომ „ოცნების“ გემი იძირება, ისინი იმასთან გადახტებიან, ვინც მთავრობაში მოდის.

ხელისუფლებას ადმინისტრაციული რესურსის გაკონტროლების შანსი ეკარგება. არ დაგვავიწყდეს, რომ მასწავლებელთა დიდი რიცხვი სააკაშვილის მოთაყვანე იყო. ამასთან, „ქართულ ოცნებას“ ძალოვან უწყებებში ვითარების გაკონტროლება მოუწევთ. პირდაპირ ვიტყვი, „ოცნებამ შესაძლოა, ის მიიღოს, რაც „ნაციონალურმა მოძრაობამ“ 2012 წელს მიიღო, როდესაც სამხედროებმა და სამართალდამცავი უწყების წარმომადგენლებმა მათ მხარი არ დაუჭირეს. არ დაგვავიწყდეს, ეს ის „ნაციონალური მოძრაობაა“, რომლის დროსაც ასეთი არჩევანის გაკეთება მინიმუმ სამსახურის დაკარგვად დაუჯდებოდა სამართალდამცავ სტრუქტურებს. მათ ეს არჩევანი იმიტომ მიიღეს, რადგან ხვდებოდნენ, რომ ეს „ნაციონალური მოძრაობის“ ხელისუფლების ბოლო სიმღერა იყო. დღეს, „ქართულ ოცნებას“ ასეთ მოკლე დისტანციაზე ადმინისტრაციული სტრუქტურების მოჭიმვა ძალიან გაუჭირდება.

საქართველოში ჩამოსვლა სააკაშვილის გადაწყვეტილებაა, ხოლო ყველაფერი დანარჩენი საქართველოს მოსახლეობაზე არის დამოკიდებული, თუ რა როლში აღიქვამს და მიიღებს საზოგადოების უმრავლესობა სააკაშვილს – პატიმრად თუ იმ ადამიანად, რომელმაც, შესაძლოა, თავისი როლი ითამაშოს ქვეყნის მომავალში. შემიძლია მოგცეთ გარანტია, რომ მომავალი ხელისუფლება აუცილებად იქნება კოალიციური და ამის შემოქმედი საქართველოს ამომრჩეველი იქნება”