„პრაიმტაიმის“ ინფორმაციით, სიღნაღის მუნიციპალიტეტის ერთ-ერთ სოფელში დედამ ახალშობილი ბავშვი გზაზე, პარკში გახვეული მიატოვა.
როგორც ადგილობრივებმა განაცხადეს, ჩვილი გზაზე პოლიციამ იპოვა.
„ბავშვი ცოცხალი იყო და თვითონ პოლიციამ გადაიყვანა საავადმყოფოში“, – ამბობს ერთ-ერთი ადგილობრივი.
მისი ინფორმაციით, სამართალდამცველებმა ბავშვის დედის ვინაობა მალევე დაადგინეს.
აღმოჩნდა, რომ ქალი თბილისში მიემგზავრებოდა, თუმცა პოლიციამ ისიც ადგილობრივ კლინიკაში გადაიყვანა.
„მეგონა ბავშვი გარდაცვლილი იყო და იმიტომ დავტოვე ქუჩაშიო – უთქვამს“, – ამბობს ადგილობრივი.
შსს-მ ფაქტზე გამოძიება სისხლის სამართლის კოდექსის 127-ე მუხლით დაიწყო, რაც ადამიანის სიცოცხლისთვის საშიშ მდგომარეობაში მიტოვებას გულისხმობს.
სამედიცინო დაწესებულებაში ამბობენ, რომ ბავშვის სიცოცხლეს საფრთხე არ ემუქრება.
კომენტარები