შსს-ს სტრატეგიული კომუნიკაციების დეპარტამენტის უფროსი, ნინო გიორგობიანი, სოციალურ ქსელში, განცხადებას ავრცელებს:
“შინაგან საქმეთა სამინისტროს საზოგადოებრივი უსაფრთხოების მართვის ცენტრ 112-ში შემოვიდა ზარი მოქალაქის მიერ, რომელმაც გააკეთა შეტყობინება ჩხუბთან დაკავშირებით.
შემთხვევის ადგილზე მისულ პოლიციას ადგილზე დახვდა ტელეკომპანია პირველის ჟურნალისტი თამთა დოლენჯაშვილი, რომელმაც განაცხადა, რომ მან გააკეთა ცრუ შეტყობინება.
მისივე თქმით, შაქარაშვილის საქმესთან დაკავშირებით ჩაატარა ექსპერიმენტი. რომ არაფერი ვთქვათ მოქალაქეობრივ პასუხისმგებლობაზე და ელემენტარულ მედია სტანდარტზე, მაშინ როდესაც ცრუ შეტყობინებას აკეთებს ნებისმიერი მოქალაქე, მინიმუმ იმას უნდა იაზრებდეს, რომ შესაძლოა ამ დროს გადაუდებელი დახმარება სხვას რეალურად სჭირდებოდეს.”
ქალბატონო ნინო, გამიზნულად იმეორებთ, რომ მოქალაქემ გააკეთა ცრუ შეტყობინება, თუ მართლა ვერ არჩევთ ჟურნალისტური გამოძიების ფარგლებში ჩატარებულ ექსპერიმენტს მოქალაქის მიერ განხორციელებული ცრუ ზარისგან?
ცრუ ზარი დასჯადია და პოლიციის “ცრუ მისვლა” შემთხვევის ადგილზე – კანონიერი?
პოლიცია, რომელმაც იცის, რომ ადგილზე არიან დაშავებულნი და საჭიროა სასწრაფო დახმარება – მიდის და არც კი ნახულობს შემთხვევის ადგილებს, იქნება და სისხლითაა მორწული? არ არის ეს ცრუ მისვლა?
უამრავი ადამიანი წერს მასალების კომენტარებში რომ ბოლო დროს პოლიციას ადგილზე მისვლა აგვიანდება – შუაგული ქალაქიდან მოქალაქემ დაგირეკათ, გითხრათ რომ მარტოხელა, ავადმყოფ მამაკაცს საკუთარ სახლში თავს დაესხნენ და კარს უმტვრევდნენ და პეკინის ქუჩაზე 25 წუთის მერე მივიდა ეკიპაჟი, ორი ზარის განხორციელება გახდა საჭირო, რომ 25 წუთის მერე მაინც მისულიყვნენ.
არათუ არ არის საჭირო ექსპერიმენტი, თვეში ერთხელ მაინც უნდა ვატარებდეთ, თვეში ერთხელ მაინც უნდა ვამოწმებდეთ, მართლა მოდუნდით, თუ ხალხს “ეჩვენება”…
მაგრამ, არ არის ჩვენი შსს ასეთი ხანგრძლივობით, ამდენი მედიის ერთდროულ, პერმანენტულ კრიტიკას ჩვეული და ალბათ, გაღიზიანდით?
4 ივლისს დაიწვა ე.წ. ფერად შენობასთან ადგილი, სადაც ამირხანაშვილი იმალებოდა – 8 ივლისს ჩავიდა გადასამოწმებლად შსს – 5,6,7,8 ივლისს მედია არ გაჩერებულა, ყველამ დაწერა და თქვა ამ გადამწვარ ადგილზე – და კი, მერე ჩავიდა შსს…
ჯერ ექსპერტიზის დასკვნა არ მოსულა და არ იცით, რომელ კითხვაზე მოგივათ პასუხი – “ვერ დადგინდა, არასაკმარისი, არასწორად მოწოდებული მასალის გამო”, არ იცით, იმ ადგილიდან რა დასჭირდება კიდევ ექსპერტიზას და ადგილი დაცულიც არაა…
აი, ესაა საგანგაშო…
ისე, ეს სტრატეგიული კომუნიკაცია რატომაა გამოყოფილი, არასტრატეგიული კომუნიკაციის დეპარტამენტიც გაქვთ?
ან, შსს-ს სტრატეგიული კომუნიკაციების (არასტრატეგიულის კი არა, მთლად სტრატეგიულის) დირექტორს, იმის დრო, სურვილი და შესაძლებლობა რატომ აქვს, ქვეყნის არაფორმარული მმართველის, ბიძინა ივანიშვილის და მისი მეუღლის ფოტოები აზიაროს და ავრცელოს?
და ბოლოს, პოსტების და ფოტოების გასაზიარებლად რაკი გცალიათ, იმასაც გკითხავთ, როგორ არის ბოლოს და ბოლოს, პატრული სტყუის, თუ თქვენი ნათესავი?
როგორ, მართლა მოატყუა თქვენმა ნათესავმა პატრული, არ ვიცნობ ჩხუბში მონაწილე პირებს, არ ვიცი ვინ არიანო და გასართობად წავიდა?
თუ პატრული იტყუება და თქვენ ნათესავს ტყუილად ადებს ხელს?
საწყალი შსს, როგორ მოატყუა თქვენმა ნათესავმა ასე გამოცდილი თანამშრომლები, ჰა?
ასე მარტივად ტყუვდება პატრული, რომელსაც ინფორმაცია აქვს რომ ადგილზე დაშავებულები უნდა დახვდეს და იცის რომ ათზე მეტი პირი ჩხუბობდა?
ექსპერიმენტია, ქალბატონო ნინო საჭირო, მაგის გასარკვევად, ასე ადვილად ტყუვდება პატრული, თუ არა…
თუ მართლები ხართ და თუ კარგად მუშაობს, მსგავსი ექსპერიმენტები თქვენ ინტერესებშია, დაწერდით ახლა, აი, პატრული გამოიძახეს, ნომერი რომ შემოვიდა, არ გადაგვიმოწმებია ვის ეკუთვნოდა, არ ვიცოდით, რომ ჟურნალისტი იყო, მოქალაქე გვეგონა და ნახეთ, ამდენ წუთში მივედითო…
მაგრამ, სტრატეგიას რას გავუგებთ ჩვენ, ჟურნალისტები…
ალია
კომენტარები