პოლიტოლოგი გია ხუხაშვილი მიიჩნევს, რომ 20 ოქტომბერს დაგეგმილ ევროპულ მარშს საქართველოს პრეზიდენტი პროევროპულ ოპოზიციონერ პოლიტიკოსებთან ერთად უნდა შეუერთდეს და მედიასთან, ამბობს:
“მთავარია, რომ 20-ში ეს დიდი მანიფესტაცია რომ არის დაგეგმილი, პროევროპულმა ოპოზიციამ და პრეზიდენტმა აჩვენონ ერთიანობა. ზუსტად მას აქვს ის ყველა კონტაქტი, რომელმაც უნდა უზრუნველყოს ჩვენი სწრაფად და ეფექტურად დაბრუნება ევროპულ გზაზე. ეს როლი არ დგას ეჭვქვეშ, ის განსაზღვრულია.
თუ გარდამავალი მთავრობის მთავარი ფუნქცია არის ევროპის გზაზე საქართველოს დაბრუნება და ქარტიაც სწორედ ამ სულისკვეთებით არის დაწერილი, ამ ფუნქციას ბუნებრივია, ყველაზე კარგად შეასრულებს სალომე ზურაბიშვილი. ეს ეჭვგარეშეა და ამას ვერავინ ვერ უარყოფს. შესაბამისად, ამ მთავრობას თუ ის უხელმძღვანელებს და პარტიებთან ერთად შეთანხმდება ამაზე, ეს იქნება იდეალური ვარიანტი. მე ამაში ეჭვი არ მეპარება და ამომრჩევლისთვისაც ეს იქნება სწორი გზავნილი”, – ამბობს გია ხუხაშვილი.
20 ოქტომბერს, კვირას საღამოს 17:00 საათზე თბილისის ხუთი სხვადასხვა ადგილიდან ხალხი თავისუფლების მოედნისკენ გაემართება. მოქალაქეები შეიკრიბებიან რესპუბლიკის მოედანზე, მარჯანიშვილის მოედანზე, გმირთა მოედანზე, 300 არაგველზე და ახალ ლოკაციაზე – ასათიანისა და ამაღლების ქუჩის კვეთაზე. იქნება მშვიდობიანი მსვლელობა ერთადერთი განაცხადით – “ჩვენ გვინდა ევროპაში!”
კომენტარები