საერთაშორისო ურთიერთობების სპეციალისტი, თორნიკე შარაშენიძე ამბობს, რომ ჟურნალისტ გიორგი გაბუნიას ლიკვიდაცია სიმბოლურად მის მიერ ვლადიმერ პუტინის პირდაპირ ეთერში გინებიდან ერთი წლის თავზე იგეგმებოდა.
“იქიდან გამომდინარე, რომ ახლა დააკავეს ეს ადამიანი, როგორც ჩანს, იგეგმებოდა ეს მკვლელობა, მე მაინც მგონია, წლისთავზე, ვგულისხმობ ერთი წლის შემდეგ, მას მერე, რაც გაბუნიამ აგინა პუტინს. არჩევნებამდე რამდენიმე თვეა დარჩენილი და შესაბამისად გასაგებია, რომ იმათ დესტაბილიზაცია უნდათ, მაგრამ მე მაინც მგონია, სიმბოლური აქტი იქნებოდა, რომ ერთი წლის შემდეგ მოეკლათ”, — განუცხადა შარაშენიძემ TV პირველს.
2019 წლის ივლისში, გიორგი გაბუნიამ, რომელიც მაშინ რუსთავი 2-ზე მუშაობდა, პირდაპირ ეთერში წამყვანმა გიორგი გაბუნიამ რუსეთის პრეზიდენტ ვლადიმერ პუტინს აგინა. ამას რუსულ მედიაში გამოხმაურება მოჰყვა, განცხადება გააკეთა პუტინმაც და თქვა, რომ “ასეთი ადამიანების წინააღმდეგ საქმის აღძვრა დიდი პატივია”.
“ვიღაც გამოვიდა, რაღაც წამოროშა, საკუთარი თავის რაღაცად წარმოსაჩენად. მის შესახებ არავინ არაფერი იცოდა, ახლა ყველა მასზე ლაპარაკობს”, — თქვა პუტინმა გაბუნიაზე.
ბოდიშის მოხდა და დევნის დაწყება კი ჩეჩნეთის ლიდერმა, რამზან კადიროვმა მოითხოვა. მან გაბუნიას გადამალვა ურჩია, “რადგან მსოფლიოში არის მილიონობით ახალგაზრდა, რომელთაც უყვართ პუტინი” და “პირველივე შემხვედრი გაუკეთებს მას იმას, რაც დაიმსახურა”.
კომენტარები