რა შემთხვევაში გაიაფდება პური? – ეს ამბავი ოქტომბრის ბოლოსკენაა დაგეგმილი

ანი დვალიშვილი

ისევ დაიწყო – ირაკლი ღარიბაშვილს სახლში გაუშვებენ, მის ნაცვლად პრემიერი გრიგოლ ლილუაშვილი გახდება, ხოლო სუს-ის უფროსის ადგილს ვახტანგ გომელაური დაიკავებსო. არადა, ახლა სწორედ ის პერიოდია, როცა ღარიბაშვილის წასვლაზე და მით უმეტეს, ლილუაშვილის მოსვლაზე, არავინ ფიქრობს. გუნდის შიგნით ყველამ კარგად იცის, რომ ახლა, დღევანდელ რეალობაში, ნებისმიერი ცვლილება მთავრობაში, ბევრ კითხვის ნიშანს გააჩენს, დანარჩენებსაც მოსვენებას დაუკარგავს და რაც მთავარია, არასწორმა გადაადგილებამ, ბოლო დროს შექმნილი, გარეგნული, მაგრამ მაინც ჰარმონია, შესაძლოა, დაარღვიოს. ისე, თუ აკვირდებით, ღარიბაშვილის გადადგომაზე საუბარი ორ თვეში ერთხელ იწყება და ოდესმე აუცილებლად გაარტყამენ წყაროები, რადგან ამ ქვეყანაზე მუდმივი რომ არაფერია, გასულ კვირას დამტკიცდა – 70-წლიანი მმართველობა დასრულდა და 73 წლის მამაკაცი პირველად… დასაქმდა… მეფედ.

ქვეყნისთვის საუბედუროდ, „ქართული ოცნება“ ახლა ძალიან ძლიერია და ეს იმიტომ კი არა, რომ ბევრ რამეს აკეთებს, არამედ ოპოზიცია დასუსტდა არნახულად და მათ ფონზე, მმართველი გუნდი ასე ჩანს. ისინი აკეთებენ ყველაფერს, რაც მოესურვებათ, დასავლეთიც უკვე მიეჩვია, რომ აღარ ითვალისწინებენ და მწვავე შეფასებები სულ უფრო ნაკლებად ისმის. ხანდახან თუ იკითხავს გაკვირვებული კუბილიუსი, რას აკეთებთო, თორემ დანარჩენები… კუბილიუსსაც მკვახე პასუხები არ აკლდება „ოცნების“ ლიდერთა მხრიდან და ახლა, როგორმე თუ ფასები შემცირდება… გაგიკვირდებათ და, ხელისუფლება, იმის მიუხედავად, რომ ხმამაღლა აცხადებს, კერძო ბიზნესში არ ვერევიო, ჯიუტად ცდილობს, როგორმე ფასი პურზე შეამციროს და ამისთვის თურქეთთან აქტიური მოლაპარაკებებია დაწყებული. მოგეხსენებათ, უკრაინიდან და რუსეთიდან ხორბალი სწორედ თურქეთს გააქვს და მერე რა, რომ დასავლეთმა ხმამაღლა თქვა, თანხმობას იმიტომ ვიძლევით, მსოფლიო ბაზარზე სასურსათო კრიზისი დასრულდეს და განვითარებად ქვეყნებს, განსაკუთრებით კი აფრიკის კონტინენტის წარმომადგენლებს, ხორბალზე წვდომა ჰქონდეთო. მერე რა, რომ უკვე გატანილი 2 მილიონი ტონიდან, აფრიკის ქვეყნებში მხოლოდ 60 ათასი ტონა წავიდა (ოფიციალურად) და დანარჩენი დასავლეთმა გადაინაწილა და მარაგები შეივსო. საქართველოს ცოტა სჭირდება, ძალიან ცოტა და თუ თურქეთის დაყოლიება მოხდება ამ ცოტაზე, პურის ფასი 20-30 თეთრით დაიკლებს, რაც ხელისუფლებას შესაძლებლობას მისცეს, ეს თემა ყველაზე ცოტა, ორი კვირა მაინც ატრიალოს ეთერში. ბარემ იმასაც გეტყვით, რომ აღნიშნულის განხორციელება ოქტომბრის ბოლოსთვის იგეგმება.