„რა შეიცვალა ივანიშვილის მოსვლით? მე, პოეტი კაცი, როგორც მანამდე ვმუშაობდი დარაჯად, დარაჯი ვარ დღესაც“ – გოჩა ხარანაული

ნანა სულავა

„ალიას“ ესაუბრება პოეტი გოჩა ხარანაული.

-ივანიშვილმა მართალია, ბევრი ეკლესია-მონასტერი ააშენა, მაგრამ წმინდა მამები გვეუბნებიან, პირველ რიგში, უნდა აშენდეს სულიწმინდის ტაძარი. მან ქვის აშენება დაიწყო და გამორჩა მთავარი – ადამიანი. ცათამბჯენები ააგოს, თუ გინდა, ქართველი თუ დამცირებული და შეურაცხყოფილი და ქვეყნიდან გაქცეული იქნება, ვის უშენებს ეკლესია-მონასტრებს? რაღა აზრი აქვს მის ქველმოქმედებას, როცა ქართველი ადამიანი ფეხზე ვერ წამოდგა. ჩემს თავზე ვგრძნობ, რაც გააკეთა. მე პირველმა გავაპროტესტე ნაციონალებთან კოჰაბიტაცია. ეს იყო დიდი ღალატი. ხომ მოგვიბრუნდნენ? რომ მოდიხარ, უნდა შეცვალო, შენ კი იგივეს ტოვებ, რა, მაკიაჟს უკეთებ? რა შეიცვალა? ურნებში კიდევ უფრო მეტი ქართველია ჩაყუდებული; კიდვ უფრო მეტი ქართველია გაქცეული ქვეყნიდან; კიდევ უფრო მეტი მოხუცია ხელგაწვდილი და კიდევ უფრო მეტი შიმშილობს. ქართველი ერი გააღატაკა და ერთი მუჭა ჩინოვნიკების ხელში კი მილიონებია. მე, პოეტი კაცი, როგორც მანამდე ვმუშაობდი დარაჯად, დარაჯი ვარ დღესაც. ყველგან მონოპოლიებია გაბატონებული. საარჩევნო პროგრამა არ შეასრულა და ერთი წლის მერე მიიმალა. თან გვაყვედრის, ეს ავაშენე, ის ავაშენეო. ჩვენმა წინაპრებმა იმდენი ეკლესია-მონასტრები ააშენეს, ნეტა იმის მადლს გავიგებდეთ. ამ ყველაფრის შემდეგ რატომ უნდა მაინტერესებდეს ევროკავშირი? მე მაინტერესებს ისეთი სახელმწიფო, რომელიც სხვის დაკრულზე არ იცეკვებს. დამნაშავე პრეზიდენტი ვერ დაგვიჭერია. სახალხო პარტია და მთელი ევროსაბჭო გვიკიჟინებს, გამოუშვით, გამოუშვით ციხიდანო. ე.ი. რა გამოდის, კოლონია ვართ და სხვების მითითებით უნდა ხდებოდეს ქვეყნის მართვა? არ უნდათ იმის დანახვა, რა ზიანი მიაყენა მისმა სისხლიანმა მმართველობამ ქვეყანას. მათ თავიანთი იმპერიალისტური გეგმების განხორციელება უნდათ ჩვენს ქვეყანაში და სააკაშვილიც იმიტომ უნდათ, რომ კარგი შემსრულებელია.

ირლანდიის რესპუბლიკის სენატმა მიიღო რეზოლუცია, რომ საქართველოს ჰქონდეს ევროკავშირის წევრობის კანდიდატის სტატუსი, მაგრამ შეიძლება იმიტომაც არ გვიღებენ, რომ სააკაშვილი ციხეშია. მაშინ გამოდის, რომ ესენი ჩვენი მჩაგვრელები და დაუძინებელი მტრები ყოფილან. ეტყობა, მათ ჩვენი ისტორია არ იციან. ჩვენ 7 ათასი წლის წინანდელი ქვევრი გვაქვს, ყურძნის ათასამდე ჯიში გვქონდა, ვაზი, ფოლადი, ხორბალი ევროპას ჩვენ მივეცით. „ოქროს საწმისი“ ჩვენ მოგვპარეს. მედიცინა ჩვენგან მოდის. ამერიკელი საქართველოს რომ ახსენებს, ამაში ფულს უნდა იხდიდეს. რაც შეეხება რუსეთს, მეძახიან რუსეთუმეს და მეძახონ, რადგან მათ ქართველების ფასი იციან. ყველაზე მეტი კვლევები ქართული ფენომენის შესახებ რუსებს აქვთ ჩატარებული. არ დამიწყონ ახლა თავდასხმები. 2008 წლის ომი პროვოცირებული იყო. ამერიკელებმა რუსეთი წააქეზეს, ჩვენი უტვინო პრეზიდენტი გაათამამეს, დაარწმუნეს, რომ რეალურ დახმარებას საქართველო ამერიკიდან მიიღებდა. ასეც მოხდა. სააკაშვილმა ისეთი რამ გააკეთა, რაც რეალობასთან ახლოს არ იყო.