“რა შეიძლება მოხდეს, ბადრი ჯაფარიძის საპარლამენტო მანდატის ირგვლივ?” – ლევან იოსელიანი

დეპუტატი, ლევან იოსელიანი:

“ბევრმა მკითხა, რა შეიძლება მოხდეს, ბადრი ჯაფარიძის საპარლამენტო მანდატის ირგვლივ.

აღნიშნულთან დაკავშირებით ერთის მხრივ სახეზე გვაქვს საქართველოს პარლამენტის რეგლამენტის დანაწესი, რომლის თანახმადაც, პარლამენტის წევრს უფლებამოსილება ვადამდე შეუწყდება, თუ იგი კანონიერ ძალაში შესული სასამართლოს განაჩენით ცნობილია დამნაშავედ და შესაბამისად პარლამენტი ვალდებულია განიხილოს პარლამენტის წევრის უფლებამოსილების ვადამდე შეწყვეტის საკითხი მაგრამ, მეორეს მხრივ არის პოლიტიკური მიზანშეწონილობის საკითხი, მართალია კანონის მოთხოვნის შესაბამისად, აღნიშნული საკითხი განსახილველად უნდა დადგეს პლენარულ სხდომაზე, თუმცა პარლამენტს შეუძლია მხარი არ დაუჭიროს ჯაფარიძისთვის სადეპუტატო უფლებამოსილების ვადამდე შეწყვეტის გადაწყვეტილებას, რის უფლებამოსილებასაც მას კანონმდებლობა აძლევს, და რაც პარლამენტმა ერთხელ უკვე გამოიყენა მაშინ როდესაც, გასულ წელს სადეპუტატო მანდატების შეწყვეტის მსურველი 51-ვე ოპოზიციონერს მათი მოთხოვნის მიუხედავად, არ შეუწყვიტა სადეპუტატო მანდატები.

იმედი მაქვს, ამჯერადაც ქართული ოცნება, პოლიტიკური მიზანშეწონილობით იხელმძღვანელებს.”