მსოფლიოში არსებულ მძიმე ეპიდემიოლოგიურ ვითარებაზე ამახვილებს ყურადღებას ჯანდაცვის ექსპერტი, ნორვეგიის ჯანდაცვის მინისტრის მრჩეველი ზაზა წერეთელი.
წერეთელი ფიქრობს, რომ ეპიდემიოლოგიური ვითარება ისეთია, საქართველოს სხვა ნებისმიერ საკითხზე ყურადღების გადატანის უფლება არ აქვს.
„მაშინ როდესაც ქვეყნის მთავარი ნიუსია რას ამბობს ორგანიზაცია “ემპათიის” ვსეზნაიკა, და საით შეაქანა დიქტატორი, საფრანგეთში, 1 წამში 2 კოვიდ ინფექციის ახალი შემთხვევა ფიქსირდება!!!
გაერთიანებულ სამეფოში კოვიდ შემთხვევების 90% არის გამოწვეული ომიკრონ შტამით და ინგლისში რამდენიმე საათის განმავლობაში იყო სწრაფი ტესტების დეფიციტი, იმდენად ბევრი ადამიანი იტესტება ამ მომენტში (სხვათა შორის საქართველო წყნარად უყურებს ტესტირების ნაკლებობის პრობლემასაც).
გერმანიის ჯანდაცვის მინისტრმა განაცხადა რომ ტესტების ნაკლებობის გამო, ომიკრონით გამოწვეული შემთხვევების რაოდენობა ალბათ 2-3 ჯერ მეტია, ვიდრე ოფიციალური მონაცემები.
ქვეყნებში მატულობს შეზღუდვების რაოდენობა, რომლის მთავარი მიზანია თავიდან აიცილონ მასობრივი თავშეყრები. საახალწლო შეკრებები ყველგან უქმდება…ამ დროს საქართველოში პირიქით ხდება,“ – წერს ზაზა წერეთელი.
მისი თქმით, ქვეყანა ვერ აცნობიერებს შექმნილ საფრთხეებს და ეს სერიოზულ პრობლემებს გამოიწვევს.
„რა გითხრათ, ქვეყანა იმასაც ვერ აანალიზებს რომ ყოველ შემთხვევას უამრავი კონტაქტი ჰყავს და მათი იზოლაციაც ხდება საჭირო…
ჰოდა ვინ იქეიფებს მერე და შექმნის ეკონომიკას საინტერესოა. თუმცა, მთავარი რას იტყვის “ემპათიის” ვსეზნაიკა, ის რომ ომიკრონი თურმე სუსტი შტამია და საინტერესოა დედის ბუშტი „დიქტატორი” როდის იმკურნალებს ბადენ-ბადენში,“- წერს ზაზა წერეთელი.
კომენტარები