რასაც ახლა დავწერთ, შესაძლოა წარმოუდგენლადაც ჩანდეს – „ქართულმა ოცნებამ“ თითო უბანზე თითო შტაბი გახსნა, ანუ მმართველ გუნდს საქართველოს მასშტაბით 2 ათასზე მეტი შტაბი აქვს. დედაქალაქში და მუნიციპალურ ცენტრებში თითო შტაბის შენახვა დღეში 100-150 ლარამდე ჯდება, სოფლებში – 50-70 ლარი, ანუ საშუალოდ მხოლოდ შტაბების ხარჯი დღეში 300 ათას ლარს აჭარბებს. შესაძლოა, ეს ციფრი ვინმეს არარეალურად მოეჩვენოს, მაგრამ შეგიძლიათ თავად დაიაროთ და მოიკითხოთ. რაც ყველაზე საინტერესო, სექტემბრიდან ეს თანხები გაორმაგდება და თითოეული დღე ნახევარ მილიონზე მეტი დაჯდება. საიდან ასეთი კოლოსალური თანხები? აი, აგვისტოს შემოწირულობებს რომ ნახავთ, მერე მიხვდებით. ამას გარდა, მაჟორიტარობის კანდიდატებს საკუთარი სახსრებიც ჩართული აქვთ საქმეში და დაფინანსების წყაროებს კიდევ ეძებენ.
ფული მმართველი გუნდისთვის პრობლემა ნამდვილად არ იქნება, პრობლემა სხვა რამ არის – ადამიანური რესურსი ჭირს და ეს იმის მიუხედავად, რომ „ოცნებამ“ ოპოზიციის ათეულობით აქტივისტი გადმოიბირა და რამდენიმე ათეული უკვე დაასაქმა კიდეც, სანუკვარი 41%-ის მიღება მაინც შორეულ პერსპექტივად ჩანს. თუ მეორე ტურში გარკვეული მაქინაციების გამო, სასურველი კანდიდატის გაძვრენა შესაძლებელი იქნება, პარტიული ხმები მხოლოდ პირველ ტურში ითვლება და სწორედ პირველი ტურის შემდეგ უნდა გამოჩნდეს, „ოცნება“ მთავრობას დამოუკიდებლად დააკომპლექტებს თუ კოალიციური მთავრობა გვეყოლება, ანუ ხელისუფლება, რომელიც აუცილებლად მიგვიყვანს ვადამდელ არჩევნებამდე. ამ ვარიანტს „ოცნების“ ლიდერები აქტიურად განიხილავენ და იმასაც კი ვარაუდობენ, ვისთან იქნება შესაძლებელი კოალიციის გაკეთება. თავად განსაჯეთ, როგორი საყურებელი იქნება, მაგალითად გიორგი გახარია პრემიერი და დავით ბაქრაძე მაგალითად საგარეო საქმეთა მინისტრი. ამიტომ ვამბობთ, რომ თუ მმართველი გუნდი მთავრობის დამოუკიდებლად დაკომპლექტებისთვის ხმების საჭირო რაოდენობას ვერ მიიღებს (სხვებს ამის შანსი არ აქვთ), ვადამდელი არჩევნები დამოკლეს მახვილივით დაეკიდება… ამომრჩევლის თავზე.
და ერთიც – ქობულეთში, მოსახლეობისთვის დარიგებული ბოსტნეული ტესტი იყო. ტესტი იმისა, რამდენად მიიღებდა მოსახლეობა უფასო პროდუქტს და ექნებოდა თუ არა აგრესია. ტესტმა წარმატებით ჩაიარა და კარტოფილი და ხახვი კი არა, პანდემიის მეორე ტალღის სახელით, მოსახლეობა წიწიბურას, ზეთს, მაკარონს, ბრინჯს, ფქვილს და კიდევ არაერთ პროდუქტს მიიღებს. რა თქმა უნდა, ეს ყველაფერი სახელმწიფოს ხარჯზე მოხდება, თუმცა შესაბამისი მითითებებით – პროდუქტს შემთხვევითი ადამიანები ვერ მიიღებენ.
ანი დვალიშვილი, ალია №28
კომენტარები