,, ყველაზე მთავარი ტყუილი კი ის არის, რომ საქართველოში არანაირი პრაიდი არ ყოფილა არცერთხელ” – ნათია ფანჯიკიძე

ფსიქოლოგი ნათია ფანჯიკიძე:

,,ეს პოსტი დავუწერე ამ წამს მეგობარს, კარგ და ჭკვიან ადამიანს, რომელიც რადგან კითხვას სვამს, “რა საჭიროა პრაიდი, ხომ შეიძლება თავისთვის იყვნენ”? – ესეიგი პასუხი კვლავ აუცილებელია. ამიტომ ვაკოპირებ სტატუსად ყველასთვის და ამავდროულად, ძალიან შემაშფოთა ახალმა აქტიურმა კამპანიამ – ავრცელებენ ტყუილებს, თითქოს ფესტივალზე ეშმაკის ქანდაკება ედგა ამ ხალხს და სატანისტური რიტუალებისთვის ემზადებოდნენ და ითრევენ ამ მისტიკურ შიშში ადამიანებს, რასაც თავისუფლად შეიძლება მოყვეს ბევრი ტრაგედია.

ვეცდები ავხნა ირინა: ეს ადამიანები სულ იყვნენ ზიზღის ობიექტები, ამიტომ ყველაფერი უნდა დაემალათ.
დახურული და არა ღია საზოგადოება კი ყოველთვის არის უბედურების წყარო. ამ ადამიანების მიმართ იოლი იყო შანტაჟი, შერცხვენა, მათი იძულება, ე.წ. “დავერბოვკებაც” და ასხვა ძალადობები, რადგან სიკვდილი ჯობდა იმას, რომ ვინმეს, თუნდაც ოჯახის წევრს გაეგო, რომ განსხვავებულია.
პრაიდი ჩამოყალიბდა მას მერე, რაც აშშ-ში, კლუბ ცისარტყელაში შეკრებილ ჰომოსექსუალებს სასტიკად გაუსწორდა ბრბო და დაიღუპა კიდეც ხალხი. ამის მერე გაჩნდა უფლებების დაცვის მძლავრი მოძრაობა, რომელიც გადაედო მთელ ევროპასაც, რადგან არც ევროპაში იყვნენ უკეთეს დღეში ლგბტქ ადამიანები და საზოგადოებები თვალს ხუჭავდნენ მხოლოდ გენიოსების მიმართ. თუმცა გენიოსებსაც არ ჰქონდათ ტკბილი ცხოვრება სცენის მიღმა. მაგალითად საქართველოში ფარაჯანოვი ციხეში ჩასვეს მამათმავლობის ბრალდებით. უცხოელი არტისტების მიმართაც იყო უამრავი დისკრიმინაცია მათ ქვეყნებში.
პრაიდზე სულაც არ გამოდის ყველა ადამიანი, მაგრამ თავისთავად პრაიდი არის ერთგვარი ხილვადობის აქტი, – აქ ვარ, მე ვარ, ასეთი ვარ და ამის გამო ბოდიშს ვერ მოვიხდი, რადგან ჩემი ბრალი არაა, რომ ასეთი დავიბადე.
გაცხადებულობა ადამიანებს ეხმარება თუნდაც იმაში, რომ მათ მიმართ შანტაჟი ვერ შეძლოს ვინმემ. ხილვადობა ასევე ეხმარება მათ ნორმალურ ყოფას, რადგან სანამ არ იცნობ ადამიანს, შეიძლება არ გძულდეს, მაგრამ არც გიყვარდეს და როცა გაიცნობ და აღმოაჩენ, რომ ისიც შენნაირია, ჩვეულებრივი გრძნობები აქვს, ჩვეულებრივად რეაგირებს ყველა ადამიანურ მოვლენაზე, გადასარევი მეგობარია, ჭკვიანია, კეთილია, ბუნერივად აღარ გგონია მერე ეს ადამიანი “ბუა” და ნამდვილი უფლებრივი თანასწორობა სწორედ ესაა, რომ როგორც შენ შეგიძლია გამოხატო, რომ ქალი ხარ, მასაც შეეძლოს გამოხატოს, რომ განსხავებული ორიენტაცია აქვს. ერთი წუთით წარმოიდგინე, შენ რომ მოგესიოს ბრბო და სატანა გეძახოს, რა დღეში ჩავარდები და როგორ იგრძნობ თავს. ახლა მიდის უკვე აქტიური რუსული კამპანია ამ ხალხის დემონიზების, რას გვანან, ეშმაკები არიან და დაატარებენ ვიდეოებს, ზოგს პორნოსაიტიდან მოჭრილს და ზოგსაც უცხოური პრაიდის ისეთ იშვიათ მონაწილეთა ჩვენებით, რომლებსაც შესაძლოა ჰქონდეთ რაიმე სახის ფსიქიკური პრობლემა იმ მომენტში და იმ კონკრეტულ წამს უჩვეულოდ იქცეოდნენ. ეს არის ორმაგად ბოროტება, რადგან არც ფსიქიკური მდგომარეობებია დემონური მდგომარეობები და არც ლგბტ ადამიანთა შორის არის იმაზე მეტი ექსცენტრიკული და გამომწვევი ქცევის ადამიანი, ვიდრე არა-ლგბტთა შორის.
ასევე, როცა უნდათ წარმოაჩინონ, რომ ლგბტ ადამიანები არიან გარყვნილები, ეს არის დიდი ტყუილი. მათ შორის იმდენივეა გარყვნილი, რამდენიც ყველა სხვა სქესის და ორიენტაციის ადამიანთა შორის. ბევრს საერთოდაც არ ჰყავს არანაირი პარტნიორი და ეს საერთოდ არ მიუკუთვნება გარყვნილების საკითხს.
“სახლში რაც უნდათ ის აკეთონ” – ეს დიდი ტყუილია, რადგან თუ ქუჩაში გამოსვლისას უცხოპლანეტელად მთვლი, ჩათვალე, რომ სახლიც გაკონტროლებულია. ამიტომ დღეს აქვს ამ პრაიდებს მნიშვნელობა, ხვალ არ იქნება პრაიდი საჭირო, უკვე გვეცოდინება, რომ ყველა ვართ ისეთები, როგორებიც ვართ და რომ სახელმწიფოს და კანონის წინაშე აბსოლუტურად იდენტური უფლებები გვაქვს.

პ.ს. ყველაზე მთავარი ტყუილი კი ის არის, რომ საქართველოში არანაირი პრაიდი არ ყოფილა არცერთხელ. ათი აქტივისტი თუ შეიკრიბებოდა, მათგან ლგბტქ წარმომადგენელი ნახევარიც არ იყო და ათიათასი კაცი ესხმოდა თავს მოსკალავად. ბოლო ორი წელი კი საერთოდ დახურულ სივრცეში იკრიბებიან და იქ ესხმიან თავს.”