ამნისტიის შესახებ მომზადებულმა კანონპროექტმა ბევრი ჩააფიქრა. თუ გახსოვთ, ფართომასშტაბიანი ამნისტია „ქართულმა ოცნებამ“ 2012 წელსაც გამოსცა და მაშინ ციხიდან იმდენი პატიმარი გამოვიდა და კრიმინალმა ისე მოიმატა, ბიძინა ივანიშვილი იძულებული გახდა ხმამაღლა ეთქვა, გაგებით უნდა მოვეკიდოთო. ჰოდა, ახლაც გაგებით მოგვიწევს მოკიდება იმასთან, რაც წინ გველოდება. ციხეს რამდენიმე ათასი პატიმარი დატოვებს და თუ ვინმეს იმის განცდა აქვს, რომ ამით ხელისუფლება პატიმრების ოჯახების ახლობლებს უგორებს კოჭს, ძალიან ცდებით. ამ თემაზე „ოცნების“ მაღალჩინოსანი გვესაუბრა:
„დავიწყოთ იმით, რომ ყველასთვის მოულოდნელი იყო „გირჩის“ წარმატება. ამიტომ, გუნდის შიგნით გადაწყდა ამნისტიის პროექტის მომზადება, რომელიც დიდწილად სწორედ ნარკოდანაშაულს შეეხება. 2021 წლის ადგილობრივი თვითმმართველობის არჩევნები საპარლამენტოზე რთული იქნება და ამიტომ, ხელისუფლება თადარიგს აქედანვე იჭერს. ხომ ადვილი მისახვედრია, რომ გათავისუფლებული პატიმრების 70% უკან მალევე შებრუნდება და მათი ოჯახის წევრებს აუცილებლად ექნებათ მოლოდინი იმისა, რომ ახალი ამნისტია მომავალი წლის ოქტომბერშიც იქნება. ეს რამდენიმე ათასიანი მხარდაჭერაა და თან ამით იმ აქტივსაც გადაიბირებენ, რომელიც თურმე „გირჩს“ ჰყოლია. ჰო, სწორედ რომ თურმე, რადგან ამას არც ოპოზიციაში ელოდა ვინმე და არც ხელისუფლებაში…“
ჩვენ კი გავარკვიეთ, რომ ამნისტიის მთავარი მიზეზი ეს არ გახლავთ. ხომ წარმოგიდგენიათ, რა ხდება სასჯელაღსრულების დაწესებულებებში კოვიდინფიცირებულების კუთხით მაშინ, როცა უკონტროლო სიტუაცია ციხის გარეთაცაა. საავადმყოფოს პალატებად გადაკეთებული საკნები, უამრავი ინფიცირებული, ყბადაღებული ე.წ. „მაყურებლების“ თემა, რომელთა გავლენა ახლა უფრო გაიზარდა. რატომ? იმიტომ, რომ „მაყურებლებს“ ე.წ. „ობშიაკში“ ჩვეულებრივი, სამედიცინო წამლებიც აქვთ და მედიკამენტები დღეს ყველას სჭირდება. ამასთან ერთად, პატიმრების რიცხვის შემცირების შემთხვევაში, ევროკავშირი საქართველოს ისეთი პენიტენციალური სისტემის აწყობაში დაეხმარება, როგორიც ევროპაშია და ამ ყველაფრისთვის ახალ მინისტრს, გოჩა ლორთქიფანიძეს უნდა ეხელმძღვანელა, მაგრამ ის მხოლოდ რამდენიმე თვეს დაჰყოფს თანამდებობაზე, შედეგ კი ჰააგის მოსამართლის მანტიას მოირგებს და საქართველოს 9 წლით დაემშვიდობება. აღნიშნული ამნისტიის შემდეგ, ხელისუფლება პატიმრების ისე გადანაწილებას ცდილობს, რომ თითო დაწესებულებაში რაც შეიძლება მცირე ოდენობის მსჯავრდებულები იყვნენ, რათა ვირუსის კონტროლი რაიმე ფორმით მოხერხდეს. როგორც გვეუბნებიან, პაემნებისა და ამანათების შეზღუდვამ დიდი შედეგი ვერ მოიტანა და იუსტიციის სამინისტრო უფრო რადიკალურ ზომებზე მიდის.
ანი დვალიშვილი, ალია
კომენტარები