ყველას გვძულს უკვე სიტყვა ბეტონი ამ ქალაქში – ალეკო ელისაშვილი

პარტია “მოქალაქეების” ლიდერი ალეკო ელისაშვილი დედაქალაქში გენ-გეგმის დაცვის აუცილებლობაზე საუბრობს და ამბობს, რომ ორი წლის განმავლობაში დამუშავებული განაშენიანების მარეგულირებელი დოკუმენტი, დეპუტატებმა 42-ჯერ შეცვალეს, რის შედეგადაც ქალაქში 500-ზე მეტ ზონას შეეცვალა სტატუსი. 

“ყველას გვძულს უკვე სიტყვა ბეტონი ამ ქალაქში და სკვერების ადგილას ამოსულ უშველებელ კორპუსებს გვახსენებს, მაგრამ ბევრმა არ იცის, რომ ამ განუკითხაობის, “ჯუნგლების” თუ რასაც ვუწოდებთ, დასამთავრებლად ერთი რამ არის საჭირო – ქალაქის გენგეგმის დაცვა! ეს არის განაშენიანების მარეგულირებელი დოკუმენტი, რომელსაც თითქმის 30 წელი ელოდა თბილისი, რომლის შექმნაშიც უამრავი ფული დაიხარჯა, მივიღეთ როგორც იქნა 2019-ში და 2 წლის განმავლობაში, ერთი ხელის მოსმით, 42 ცვლილება შეიტანს შიგნით ოცნების დეპუტატებმა საკრებულოში. 42 ცვლილება, რამაც ჯამში 500-ზე მეტ ზონას შეუცვალა სტატუსი! ბარემ დაგვეხია ეგ გეგმა! გერმანიის მაგალითს მოგიყვანთ – 2 წელი სჭირდება საშუალოდ იქაურ ქალაქებში ერთი ცვლილების შეტანას. კიდევ მეტი სიცხადისთვის გეტყვით, რომ გენგეგმაში შავით თეთრზე ეწერა – ვაშლიჯვრის ფერდზე მშენებლობა არ შეიძლებაო!“, – აცხადებს ალეკო ელისაშვილი.