„პუტინს სულ უფრო და უფრო უმცირდება საგარეო პოლიტიკური მანევრების შესაძლებლობა და რაც არ უნდა იბრიქოს, რუსეთის იზოლაცია იზრდება“ – ირაკლი მელაშვილი

ყოფილი პარლამენტარი, ირაკლი მელაშვილი:

„მე მგონი ან სულ გარეკეს რუსებმა, ან სი ძინ პინის და პუტინის შეხვედრა ცუდი შედეგით დასრულდა. შორეულ აღმოსავლეთში, რომელიც ესაზღვრება ჩინეთს, რუსულმა ФСБ-მ ჩინეთის აგენტობის ბრალდებით დაიწყო მასობრივი დაპატიმრებები. BBC-მ ბოლო ერთი თვის განმავლობაში მინიმუმ ექვსი ასეთი შემთხვევა დააფიქსირა , რაც სულაც არ ნიშნავს რომ ასეთი დაპატიმრებები მეტი არ მომხდარა. რუსების მხრიდან მსგავსი არამეგობრული ნაბიჯები სრულიად გაუგებარი ჩანს პუტინის მიერ ჩინეთის სტრატეგიულ პარტნიორად გამოცხადების ფონზე, თან მაშინ როცა დასავლური სანქციების გამო ეკონომიკურად მოსკოვი სულ უფრო მეტად დამოკიდებული ხდება პეკინზე. ორი დღის წინ ჩინეთმა გაეროში პირველად დაუჭირა მხარი რეზოლუციას, სადაც რუსეთი აგრესორად არის მოხსენებული როგორც უკრაინასთან, ისე საქართველოსთან მიმართებაში. როგორც კი ჩინეთმა ეს გააკეთა, მას ეგრევე აუბეს მხარი ბრაზილიამ, ყაზახეთმა სომხეთმა და კიდევ რამდენიმე ქვეყანამ, რომლებიც ადრე ყოველთვის ჩინეთივით თავს იკავებდნენ. (სხვათა შორის ჩინეთის კონტექსტში სომხეთის ხსენება არ უნდა გავიკვირდეს, პაშინიანის მთავრობის პირობებში ამ ორი ქვეყნის პოლიტიკური კავშირები ძალიან გააქტიურდა და გაცილებით უფრო მაღალ დონეზე ავიდა). ჰოდა, კრემლის განდეგილმა” გარეკა ბოლომდე, თუ რუსულ სპეცსამსახურებაში მომუშავე ანტიჩინურმა ძალებმა, რომლებიც ჩინეთს, რუსეთის ტერიტორიული მთლიანობის მთავარ საფრთხედ მიიჩნევენ, დაიწყეს საკუთარი თამაში, ძნელი სათქმელია. ფაქტია, რომ პუტინს სულ უფრო და უფრო უმცირდება საგარეო პოლიტიკური მანევრების შესაძლებლობა და რაც არ უნდა იბრიქოს, რუსეთის იზოლაცია იზრდება. პუტინს მოკავშირედ მხოლოდ სირია და ნიკარაგუა რჩება, ლუკაშენკოც კი ცდილობს ბოლო დროს მისგან დისტანცირებას. Батька-ც როდის მიატოვებს არავინ იცის.“