პუტინი, ივანიშვილი, პონტა და შარვაშიძე – მითვისებული ნაშრომები, პლაგიატი და პროფესიული თვითმკვლელობა

თბილისის სახელმწიფო უნივერსიტეტის რექტორს, გიორგი შარვაშიძეს სადოქტორო დისერტაციის პლაგიატი დაუდგინდა.

გაირკვა რომ 140 გვერდიანი დისერტაციიდან, მას 40 გვერდი სიტყვა-სიტყვით გადაწერილი ჰქონდა. 

პლაგიატი – ეს არის შემოქმედების, იდეებისა, ნაშრომებისა თუ გამოგონებების გააზრებული მითვისება, რაც ცივილიზებულ სამყაროში პროფესიულ სიკვდილს ნიშნავს.

კერძოდ: “თავისუფლების მონიტორმა მოიძია დოკუმენტები, რომლებიც ექსპერტების შეფასებით, თბილისის სახელმწიფო უნივერსიტეტის რექტორს, გიორგი შარვაშიძეს პლაგიატში ამხელს. 

მისი დისერტაციის თემა იყო: „სტრუქტურული რეფორმები უმაღლეს განათლებაში და საქართველოს კერძო უმაღლესი სასწავლებლების განვითარების ტენდენციები“. 


“თავისუფლების მონიტორის” ინფორმაციით, დისერტაცია გიორგი შარვაშიძემ 2003 წელს დაიცვა და 40 გვერდი, 2002 წელს, ღია საზოგადოების მხარდაჭერით გამოცემული დოკუმენტიდან: “საქართველოში უმაღლესი განათლების განვითარების ძირითადი მიმართულებები” გადაიწერა.

არის შემთხვევები, როდესაც პლაგიატს ქვეყნის უმაღლესი თანამდებობის პირები მიმართავენ, თუმცა, იქ, სადაც მაღალი განათლების დონე და დემოკრატიაა, მათ, სხვისი ნაშრომების მითვისება საკმაოდ ძვირად უჯდებათ.

მაგალითად: 2006 წელს, ბრუკინგსის უნივერსიტეტის მკვლევარებმა რუსეთის პრეზიდენტი, ვლადიმერ პუტინი პლაგიატში დაანადაშაულეს. 

მკვლევარებმა განაცხადეს რომ პუტინმა, თავისი ეკონომიკური ნაშრომიდან 16 გვერდი, პიტსბურგის უნივერსიტეტის ბაზაზე 20 წლით ადრე მომზადებული დოკუმენტიდან გადაიწერა. თუმცა, მას ამის გამო პასუხი არ უგია. 

სამაგიეროდ, ძვირად დაუჯდა პლაგიატი გერმანიის თავდაცვის მინისტრს, კარლ თეოდორ გუტენბერგს.

2011 წელს, გუტენბერგი, რომელსაც მერკელის მთავრობაში ლამის მომავალ კანცლერად განიხილავდნენ, პლაგიატში ამხილეს, რის შემდეგაც ის თანამდებობიდან გადადგა. ხოლო ბაიროუთის უნივერსიტეტმა მას დოქტორის წოდება გაუუქმა.

2012 წელს, პლაგიატში დაადანაშაულეს რუმინეთის პრემიერ მინისტრი, ვიქტორ პონტაც. 

ბრალდების მიხედვით, მან, 2003 წელს მომზადებულ სადოქტორო ნაშრომში, რომელიც სისხლის სამართალს ეხებოდა, პლაგიატი გამოიყენა.

მაშინ, პრემიერის მიერ სხვისი ნამუშევრის მითვისების გამო, ლამის მთელი ქვეყანა საერთაშორისო სკანდალში გაეხვა. 

საბოლოოდ, 2014 წელს, პონტას ბუქარესტის უნივერსიტეტმა სადოქტორო ხარისხი ჩამოართვა.

თუმცა, კიდევ უფრო მძიმეა სიტუაცია მაშინ, როდესაც პლაგიატში ამხელენ უნივერსიტეტის რექტორს. პირს, რომელიც თავისი სტატუსიდან გამომდინარე, იქით უნდა ებრძოდეს პლაგიატს – სხვისი ნაშრომის მითვისება-გამოყენებას წყაროს დასახელების გარეშე. 

ევროპისა და ამერიკის უნივერსიტეტებში, სტუდენტიც კი შავ სიაში ხვდება, თუ ის სხვის ნაშრომს მოიპარავს. ამის გათვალისწინებით, ადვილი წარმოსადგენია რა შეიძლება დაემართოს უნივერსიტეტის რექტორს – პლაგიატის შემთხვევაში. 

P.S: ბიოგრაფიის მიხედვით, მოსკოვის შრომისა და სოციალური პრობლემების ინსტიტუტში, 1986 წელს, საკანდიდატო ნაშრომი დაიცვა ქვეყნის არაფორმალურმა მმართველმა, ბიძინა ივანიშვილმა თემაზე: “მეცნიერული ორგანიზაცია და შრომის ეკონომიკა”, რომლის ირგვლივაც ასევე აქტიურად ვრცელდებოდა ხმები იმის შესახებ რომ ოლიგარქმა სამეცნიერო ნაშრომი, უბრალოდ, იყიდა.

„პრესა.ჯი“