“პროკურატურის მოწმეები პარტიული მუშაკები არიან, არც დაუმალავთ” – ადვოკატი

გიორგი გახარიას წინააღმდეგ პროკურატურამ დღეს თბილისის საქალაქო სასამართლოში ჩორჩანას მიმდებარე სოფლიდან ადგილობრივები მიიყვანა.

მოწმე ამტკიცებდა, რომ საგუშაგოს ჩადგმის შემდეგ მათ პრობლემები შეექმნათ. თუმცა დაცვის მხარისთვის ეს მოწმეები არასანდოები არიან.

ადვოკატი ბერდია სიჭინავა ამბობს, რომ ყველა ადგილობრივი მოწმე, ან “ოცნების” პარტიული მუშაკი ან ადგილობრივი სკოლის წარმომადგენელია.

აღსანიშნავია ის გარემოება, რომ აქ რომელი ადგილობრივებიც მოჰყავთ და ჰკითხავენ, კონკრეტულ შემთხვევაში ბევრი მათგანი დამოკიდებულია ხელისუფლებაზე და ისინი არც მალავენ ლოიალურ დამოკიდებულებას “ოცნების” ხელისუფლების მიმართ. შესაბამისად, აქამდე რა დაკითხული მოწმეებიც არიან, არ დაუმალავთ მათი პირდაპირი კავშირი “ოცნებასთან”. ზოგი არის ადგილობრივი საჯარო მოხელე, ზოგი არის “ოცნების” პარტიული მუშაკი, ზოგი არის ადგილობრივი სკოლის წარმომადგენელი. შესაბამისად, ამ ადამიანების მოწოდებული ინფორმაცია ბუნებრივია ვერ იქნება სანდო  ძალიან მარტივი მიზეზის გამო – ეს ადამიანები მოწყვლადი არიან იქ, ადგილობრივი ხელისუფლების. შესაბამისად, რა პრინციპით შეარჩიეს საერთოდ ეს ადამიანები, რა პრინციპით არ ჰყავთ აქ სასამართლოზე გამოძახებული თვითონ ჩორჩანელები, ეს ჩვენს დასკვნით სიტყვაში ჩვენი პოზიციების წარმოდგენის საგანი გახდება”, – ამბობს ბერდია სიჭინავა.

ე.წ. ჩორჩანას საქმეზე ბრალდებულია ყოფილი შინაგან საქმეთა მინისტრი და ყოფილი პრემიერ-მინისტრი გიორგი გახარია. პროკურატურის ვერსიით, მან სოფელ ჩორჩანასთან დამატებითი საპოლიციო საგუშაგოს განთავსების გადაწყვეტილება ერთპიროვნულად მიიღო. გახარიას ბრალი სისხლის სამართლის კოდექსის 25, 117-ე მუხლის მე-3 ნაწილის „მ“ ქვეპუნქტითა და 333-ე მუხლის მე-2 ნაწილით აქვს წარდგენილი.