სამწუხაროდ, პრეზიდენტის განცხადებები გვახსენებს იმ ადამიანის პოზიციას, შარზე რომ არის და თავს რომ იბრაზებს და რაღაც უნდა ამის შემდეგ. მოდით, დაველოდოთ, რა იქნება ის „რაღაც“ , – ამის შესახებ ფრაქცია “ქართული ოცნების” თავმჯდომარემ მამუკა მდინარაძემ პრეზიდენტის სალომე ზურაბიშვილის განცხადებების შეფასებისას განაცხადა.
მისი თქმით, მმართველი გუნდი ამ პროვოკაციებს არ უნდა წამოეგოს.
“ალბათ გამოჩნდება რისთვის აკეთებს ამ ყველაფერს. იმდენად პროვოკაციულია დამოკიდებულება, რომ ჩვენ ამ პროვოკაციებს მგონი, არ უნდა წამოვეგოთ. გაბრაზება ხან ზოგადი პოლიტიკური სარჩულით, მერე აბსოლუტურად არასწორი, არარელევანტური „მესიჯები“ 26 მაისთან დაკავშირებით და შემდეგ საზოგადოების რეაქციაც შესაბამისი იყო, შემდეგ პროტოკოლზე გაბრაზება რას ემსახურება, შეიძლება მომავალმა გამოაჩინოს და ვნახოთ. ჩვენ ამ პროვოკაციას არ უნდა წამოვეგოთ“, – განაცხადა მდინარაძემ.
მისივე შეფასებით, სალომე ზურაბიშვილის გზავნილებისთვის – კრიტიკული რბილი შეფასებაა.
ის ასევე გამოეხმაურა პრეზიდენტის ვიზიტს ბრიუსელში და აღნიშნა, რომ იმედია, ისეთივე „კრიტიკული“ არ იქნება სალომე ზურაბიშვილის შეფასებები ქვეყნის გარეთაც და იქნებ მან „ობიექტურობის გამოჩენა შეძლოს“.
„კრიტიკული რბილი შეფასებაა და ამავე შეფასებით ვიტყვი, რომ ასეთი „კრიტიკული“ ქვეყნის გარეთაც არ ექნება. იმ ფრთის წარმომადგენლებს, რომელსაც ახლა ქალბატონი სალომე ნარატივში შეუერთდა, რამდენიმე კვირის წინ ასეთი “მესიჯი” ჰქონდათ, რომ ქვეყნის გარეთ კი არ ვამბობთ ასეთ რაღაცებს, ქვეყნის შიგნით ვამბობთო და დღეს, ამ საუკუნეში, ქვეყნის შიგნით ვამბობო რას ნიშნავს?! ქვეყნის შიგნით, რომ ამბობ არ გადის ის “მესიჯები” გარეთ, ჩვენი უცხოელი პარტნიორები ამას ვერ იგებს და გარეთ თუ იტყვი მარტო იმას იგებენ?! ეს რა დამოკიდებულებაა ვერ ვხვდები. ამიტომ, იმედია, ისეთივე „კრიტიკული“ არ იქნება ქალბატონი სალომეს შეფასებები ქვეყნის გარეთაც და იქნებ რაღაც ნაწილში მაინც ობიექტურობის გამოჩენა შეძლოს. ეს იქნება ქვეყნისათვის ძალიან კარგი და არა რომელიმე პოლიტიკური წარმომადგენლისთვის“, – აღნიშნა მდინარაძემ.
კომენტარები