ჟურნალისტი, ვახო სანაია:
“ვეცადე, მარტივად მეთქვა, რა ბოროტებაა ორი მწვანე პასპორტი. იქ ტიკარაძემ იხუმრა ღარიბაშვილის მასობრივი მკვლელობის გადაწყვეტილებაზე, მერე ჩვენც გავიცინეთ ფეისბუქზე, მერე ვითომ არც არაფერი. სინამდვილეში გაეცანით ბოროტების მასშტაბებს.
●
წარმოიდგინეთ საქართველოს მოქალაქე.
ეს მოქალაქე არ არის აცრილი.
ამ მოქალაქეს, მაგალითად, 6 თვის წინ კოვიდი შეეყარა და გადაიტანა.
კოვიდის მოხდის შემდეგ იმუნინეტი სადღაც 6 თვე გინარჩუნდება და მერე შეიძლება, ისევ დაავადდე.
როგორც გითხარით, ეს მოქალაქე არ იყო აცრილი. კოვიდის გადატანის შემდეგაც არ აპირებდა აცრას.
გავიდა 6 თვე და მაინც არ იცრება. ამასობაში იმუნიტეტიც ამოეწურა. რისკი გაიზარდა, რომ ისევ დავირუსდება.
ახლა ამოქმედდა მწვანე პასპორტი.
თუ ეს პასპორტი არ ექნება, ვერ შევა ბევრს ობიექტზე – რესტორნები, სასტუმროები და ასე შემდეგ.
მწვანე პასპორტმა მოქალაქეს უნდა უბიძგოს აცრისკენ, რადგან რესტორანშიც უნდა წასვლა და ბევრ სხვა ადგილზე. თან იცი, რომ გარშემო ამ ობიექტებზე ყველა უსაფრთხოა.
და აი ამ დროს სცენაზე შემორბის ღარიბაშვილი და ამბობს, რომ მეორე მწვანე პასპორტია საჭირო.
ღარიბაშვილი იმავე სიბრძნეს განავრცობს – ვისაც ოდესმე გადაუტანია კორონა, ყველას უნდა მივცეთ სამუდამო მწვანე პასპორტიო.
ამრიგად – 6-თვიანი იმუნიტეტი, ვაქცინაციისკენ ბიძგი, ისა, ესა. დაიკიდეთ ყველაფერიო. მთელი მსოფლიო ამბობს, აიცერითო, იმუნიტეტი საშუალოდ 6 თვე მოქმედებს და ხელმეორედ დაგემართებათო. მარტო საქართველოში 5 ათასი ადამიანი დაავადდა მეორედ. ანუ ერთხელ მოიხადეს კორონა და მეორედაც დაემართათ.
ანუ პრემიერ-მინისტრი ჰქვია და ხალხს შესთავაზა გზა, თავი აარიდონ აცრას.
საქართველოში 12 000-ზე მეტი გარდაცვლილი გვყავს. აქედან თითქმის 99 პროცენტი აუცრელი იყო.
ამ ფონზე ღარიბაშვილს შემოაქვს მეორე პასპორტი, რომელიც სხვა არაფერია, თუ არა აცრისგან თავის არიდება.
ანუ ადამიანებს იმეტებს სიკვდილისთვის.
ჩნდება კითხვა – რატომ აკეთებს ამას ?
იმიტომ, რომ სამღვდელოება მხარს არ უჭერდა ვაქცინაციას, ათას სისულელეს ქადაგებდნენ ამბიონებიდან, ხელისუფლებამ საინფორმაციო კამპანია ჩააგდო – ამ ყველაფრის შედეგად მოსახლეობის უმრავლესობა არ აიცრა. შესაბამისად მსხვერპლის რაოდენობა კატასტროფულია.
ღარიბაშვილი კი, როგორც ჯაღმაიძეთა და სხვა მსგავსთა თანამოაზრე, ფიქრობს, რომ აუცრელი უმრავლესობაა მისი დასაყრდენი. ოღონდ დეზინფორმაციით გაბრუებულ ამ ადამიანებს პირდაპირ უშვებს სასაკლაოზე.
უბრალოდ, დაფიქრდით, როგორ ფეხებზე კიდია ადამიანების ჯანმრთელობა და სიცოცხლე ხელისუფლებას.
მერე ვიღაცებს უკვირთ რამე ქართული ოცნებისგან.”
კომენტარები