თბილისის მერმა, კახა კალაძე მედიასთან საუბრისას რუსეთის საგარეო საქმეთა მინისტრ სერგეი ლავროვის იმ განცხადებას გამოეხმაურა, სადაც ლავროვი ოკუპირებულ აფხაზეთსა და ოსეთს საქართველოს მეზობელ ქვეყნებად მოიხსენიებს და აცხადება, რომ რაკი საქართველოს დღევანდელი ხელისუფლება, მისივე თქმით, სამართლიანად აფასებს წარსულს, მოსკოვი მხარს დაუჭერს ამ “სამი ქვეყნის” შერიგებას, იმ პირობებით, რა პირობებითაც, ლავროვის თქმის, ეს ორი მეზობელი ქვეყანა (საუბარია ოკუპირებულ რეგიონებზე) გადაწყვეტს.
კახა კალაძე:
„ამასთან დაკავშირებით პარტიის საპატიო თავმჯდომარემ, ბატონმა ბიძინა ივანიშვილმა საკმაოდ ვრცლად ისაუბრა. ეს უნდა მოხდეს ურთიერთშერიგებით, ეს უნდა მოხდეს მხოლოდ და მხოლოდ მშვიდობით, განვითარებით, ურთიერთპატიებით. ჩვენ ყველამ უნდა შევძლოთ, გავაანალიზოთ წარსული, ასევე, შეცდომები რა გვაქვს დაშვებული. ჩვენ არ ვაპირებთ იმ პარალელურ სამყაროში ცხოვრებას, რომელსაც კოლექტიური რადიკალური „ნაციონალური მოძრაობა“ თავისი მეპატრონეებით ქმნის.
რაც შეეხება რუსეთის საგარეო საქმეთა მინისტრის განცხადებას, რა თქმა უნდა, ჩვენი ხელისუფლება პოზიტიურად აფასებს აღნიშნულ განცხადებას. ის, რომ რუსეთი მიესალმება და ხელს შეუწყობს, რათა მოხდეს შერიგება, ეს რა თქმა უნდა, პოზიტიურია. თუმცა, მე ვიტყოდი, რომ ამ განცხადებებთან ერთად კარგი იქნებოდა უკვე ქმედითი ნაბიჯების გადადგმა. მაგალითად, თუნდაც ჩვენი ტერიტორიების გარკვეულ ნაწილზე, რომელიც ოკუპირებულია და დღეს რუსეთის სამხედრო ბაზებია განთავსებული, ამ განცხადებებთან ერთად, პარალელურად, კარგი იქნება, რომ დაიწყოს თუნდაც სამოქმედო გეგმის შემუშავება, რომ მოხდეს ამ ნაწილების, ჯარის გაყვანა საქართველოს ტერიტორიებიდან. კიდევ ერთხელ ვიმეორებ, საქართველოს ხელისუფლება, მთავრობა ყველაფერს გააკეთებს იმისთვის, რომ ჩვენს ოს და-ძმებთან მოხდეს შერიგება. მხოლოდ და მხოლოდ მშვიდობით, ურთიერთმიტევებით შეგვიძლია ტერიტორიული მთლიანობის აღდგენა და თანაცხოვრება“
მოსკოვი მზადაა “შეარიგოს საქართველო, აფხაზეთი და სამხრეთი ოსეთი” – ლავროვი
კომენტარები