სამოქალაქო აქტივისტს, რომელიც ყვარელში სანქცირებული ლავროვის სანქცირებული შვილის საქართველოში შემოშვებას აპროტესტებდა, სამსახურში იარაღიანმა მამაკაცმა მიაკითხა და დაემუქრა.
ბექა კვაჭანტირაძის თქმით, მას აიძულებდნენ ეთქვა, რომ სილამაზის სალონში ნარკოტიკებს მალავდა. სამოქალაქო აქტივისტი აცხადებს, რომ ამ მუქარის უკან ხელისუფლება დგას, რომელიც ახლა პუტინის რეჟიმის მოწინააღმდეგეებს კარდაკარ დასდევს და აშინებს.
აქტივისტის თქმით, ყვარელში გამართული აქციისას მას პოლიციის მაღალჩინოსანი, თეიმურაზ კალანდაძე პირდაპირ დაემუქრა და ამ მუქარიდან რამდენიმე საათში მის კუთვნილ სილამაზის სალონში შეიარაღებული კაცი შევარდა.
ამასთან, ბექა კვაჭანტირაძე შინაგან საქმეთა სამინისტროს წარმომადგენლებს, მისი ჩვენების გაყალბებაში ადანაშაულებს.
“შეიარაღებული პირი არაფხიზელ მდგომარეობაში იყო, რადგან მინდოდა, რომ მალე წასულიყო, ვუთხარი, რომ სპეციალისტი არ იყო და ვერ მოვემსახურებოდით. ამის შემდეგ მეუბნება, რომ სალონში ნარკოტიკს ვინახავ და შენობა უნდა გაჩხრიკოს.
აღმოჩნდა, რომ პოლიციამ ძალიან კარგად იცოდა, ვინ იყო ეს პირი. მეუბნებიან ასეთ ფრაზას – ვიცით ვინც არის, გიჟია და აქვს ტარების უფლება. ამ დროს მეცხრე განყოფილების ერთ-ერთი მაღალჩინოსანი ამატებს – შენ ყვარელში ხომ იყავი? დიახ, ჩვენ ყვარელში ვიყავით, სადაც პოლიციასთან შეხლა-შემოხლა გვქონდა. ძალიან ბედნიერი ვარ, რომ რუსები გავყარეთ. მაშინ, თეიმურაზ კალანდაძემ მითხრა, რომ ვიყავი უზრდელი და ვნახავდი ამ უზრდელობის შედეგს. ამ ყველაფერს მე დაშინების მცდელობად აღვიქვამ”- აცხადებს კვაჭანტირაძე. მეცხრე განყოფილებაში კომენტარს არ აკეთებენ – გუშინ მომხდარ ფაქტზე კი შინაგან საქმეთა სამინისტრომ გამოძიება 236-ე მუხლით დაიწყო რაც, ცეცხლსასროლი იარაღის მართლსაწინააღმდეგო შეძენა-შენახვა- ტარებას გულისხმობს. სავარაუდო თავდამსხმელი იდენტიფიცირებულია, თუმცა ის ამ დრომდე არ დაუკავებიათ.
კომენტარები