ხონში ახალგაზრდა კაცის ცემაში პოლიციას ადანაშაულებენ. შსს-ში კი აცხადებენ, რომ კაცი ნასვამი იყო და პოლიციელს თავს დაესხა. სახელმწიფო ინსპექტორის სამსხურმა გამოძიება სამსახურებრივი უფლებამოსილების ძალადობით გადამეტების საქმეზე დაიწყო.
პოლიციას დაკავებული თორნიკე კაკაურიძის ახლობლები ადანაშაულებენ. მათი ინფორმაციით, შემთხვევა 21 ივნისს, კომენდანტის საათის დროს მოხდა, როცა პოლიციის თანამშრომლებმა კაკაურიძეს ჯერ შენიშვნა მისცეს, შემდეგ კი სცემეს. მათივე თქმით, კაკაურიძეს პოლიციისთვის წინააღმდეგობა არ გაუწევია, მას ტვინის შერყევა და მოტეხილობები აქვს.
“ჩვენ რა ინფორმაციაც გვაქვს, პოლიციამ კომენდატიის დროს გააჩერა და ყოველგვარი ზედმეტობების გარეშე დაემორჩილა ჩემი მეგობარი. თუმცა, პოლიცია მისვლისთანავე გადავიდა ფიზიკურ შეურაცხყოფაზე. გვაქვს ასევე დადასტურებული ინფორმაცია, რომ ორივე პოლიციელი ნასვამი იყო”, — ამბობს თორნიკე კაკაურიძის მეგობარი.
მისი დეიდა კი თვითმხილველებზე დაყრდნობით შემთხვევის დეტალებს ყვება. მისი თქმით, პოლიციელი იარაღით იმ მოქალაქეებს დაემუქრა, რომლებიც კაკაურიძეს გამოესარჩლენ.
“საავადმყოფოში ვიყავი და ვნახე, რომ ფეხი აქვს მოტეხილი, ცხვირი აქვს დაჟეჟილი, თავი სტკიოდა ძალიან. მითხრეს, გადავუღეთო და არა მგონია, თავზე არაფერი არ სჭირდეს, შერყევის გარდა. ვიყავი იმ ადგილზე, იქ მთელი ქუჩა შეიკრიბა, როდესაც ასეთი ამბავი ატყდა და ვინც იქ იყო, მითხრეს, ვუყვიროდით, ნუ კლავთო. ის, ვინც ამბობს, რომ თორნიკე ხელით შემეხოო, ის თორნიკესთან ახლოს საერთოდ არ მისულა. მისთვის არც თორნიკეს დაურტყამს და არც მას თორნიკესთვის. რომ დაინახა, ხალხი შეიკრიბა და უყვიროდნენ, ნუ კლავთო, ამოიღო იარაღი და ხალხი დააყენა კუთხეში, არ გაინძრეთო”, — ამბობს თორნიკე კაკაურიძის მამიდა.
შსს-ს მტკიცებით, 27 წლის კაცი ნასვამი იყო, რომელიც 23:00 სთ-ის შემდეგ გადაადგილების შეზღუდვის წესებს არღვევდა. მათი თქმით, მას შემდეგ, რაც ის პოლიციამ შეაჩერა, სამართალდამცველებს წინააღმდეგობა გაუწია და სიტყვიერი და ფიზიკური შეურაცხყოფა მიაყენა, რის გამოც დააკავეს.
“დაკავების დროს დაზიანებები მიიღო როგორც ბრალდებულმა, ასევე, პოლიციის ერთმა თანამშრომელმა. დაშავებულები მოთავსებული არიან კლინიკაში”, — ნათქვამია შსს-ს ინფორმაციაში.
როგორ მოხდა, რომ ერთმა ნასვამმა პირმა ასეთი ძლიერი წინააღმდეგობა გაუწია პოლიციას, რომ ამდენი დაზიანება მიიღო დაკავებისას, ამას შსს არ აკონკრეტებს.
წყარო – ონ.ჯი
კომენტარები