ევროპელი ლიდერები ყველა ძალისხმევას მიმართავენ, რათა გააძლიერონ უკრაინის პრეზიდენტ ვოლოდიმირ ზელენსკის პოზიციები აშშ-ის პრეზიდენტ დონალდ ტრამპთან მოლაპარაკებებში და გეგმავენ, მის მხარდასაჭერად, ყველაზე გამოცდილი მომლაპარაკებელი გააგზავნონ.
ორი ევროპელი დიპლომატის და ასევე ერთ-ერთი წყაროს ცნობით, რომელიც ვითარებას კარგად იცნობს, მუშავდება გეგმები, რომ ზელენსკისთან ერთად ვაშინგტონში გაემგზავროს ტრამპის ერთ-ერთი ფავორიტი თანამოსაუბრე – ფინეთის პრეზიდენტი ალექსანდერ სტუბი, – წერს Politico.
იდეის მიზანია, რომ სტუბმა შეაჩეროს ტრამპსა და ზელენსკის შორის შესაძლო დაძაბულობა და დაარწმუნოს აშშ-ის პრეზიდენტი, რომ მომავალ მოლაპარაკებებში ევროპაც იყოს ჩართული. გამოცემა აღნიშნავს: ევროპა და უკრაინა ორშაბათის შეხვედრას განიხილავენ როგორც მთავარ შესაძლებლობას, რათა ტრამპი არ დაეთანხმოს რუსეთის დიქტატორ ვლადიმირ პუტინისათვის მისაღებ, მათთვის კი მიუღებელ მოთხოვნებს – მაგალითად, რუსეთისათვის ოკუპირებული უკრაინული მიწების გადაცემას. უკრაინის ევროპელი მოკავშირეები ასევე ცდილობენ, თავიდან აირიდონ ზელენსკის მხრიდან შესაძლო არაპროგნოზირებადი ნაბიჯები, რაც ამ რთულ მომენტში ურთიერთობებს შეიძლება დააზიანოს.
წყაროს ცნობით, შესაძლოა ვაშინგტონში გაემგზავროს ნატოს გენერალური მდივანი მარკ რიუტეც, რომელიც ტრამპთან ახლო ურთიერთობებშია.
„ალასკის სამიტის შედეგებმა შეშფოთება გამოიწვია ევროპაში, რადგან ტრამპმა მნიშვნელოვნად დაუჯერა პუტინის არგუმენტებს,“ — განაცხადა კამილ გრანდმა, ნატოს ყოფილი მაღალი რანგის ჩინოვნიკმა.
საქმე იმაშია, რომ ტრამპმა უარი თქვა ადრე ანონსირებულ სანქციებზე რუსეთის მიმართ იმ შემთხვევაში, თუ შეხვედრა ვერ გამოიღებდა შედეგს, და წერტილოვანი ცეცხლის შეწყვეტის ნაცვლად გადაერთო ყოვლისმომცველ შეთანხმებაზე, ფორმულირებებით, რომლებიც ძალიან ახლოსაა პუტინის რიტორიკასთან.
„შეხვედრა სრულ კატასტროფად არ მიიჩნევა, მაგრამ ევროპელები შეშფოთებულნი არიან მოვლენათა განვითარების მიმართულებით. ამიტომაც სურთ, რომ ზელენსკის ვიზიტის დროს თავიდან აიცილონ ახალი დრამა,“ — აღნიშნა გრანდმა.
გამოცემა ასევე აღნიშნავს, რომ მაშინ, როცა საჯაროდ ევროპა და უკრაინა ოპტიმისტურად გამოიყურებიან, კულისებში ოფიციალური პირები შიშით აკვირდებიან პუტინის „დაბრუნებას“ დასავლეთში, სადაც მან მოახერხა გლობალური ლეგიტიმაციის ილუზიის შექმნა, ისე, რომ არ გადადგა რეალური ნაბიჯები მშვიდობისკენ, რასაც აშშ, ევროპა და უკრაინა მოითხოვდნენ.
„ისინი ცდილობენ მაქსიმალურად მოახდინონ გავლენა მოლაპარაკებების პროცესზე, რადგან… არ სურთ ინიციატივა პუტინს დაუტოვონ,“ – განაცხადა ჯუზეპე სპატაფორამ, ნატოს ყოფილმა თანამშრომელმა და აღნიშნა, რომ ევროპას გავლენა აქვს, თუმცა შეზღუდული.
კომენტარები