,, პირველი არხის ჟურნალისტებს ცხოვრების ჯოჯოხეთად ქცევით ემუქრებიან” – ვასილ მაღლაფერიძე

,,პირველი არხის” სამეთვალყურეო საბჭოს თავმჯდომარე, ვასილ მაღლაფერიძე:

,,ნეოკანიბალიზმის შემოტევები გრძელდება და ამჯერად პირველი არხის ჟურნალისტებს ცხოვრების ჯოჯოხეთად ქცევით ემუქრებიან იმ ლეგიონის წევრები, რომლებიც ადამიანების დაგესვლაში მართლაც ძალიან დაოსტატებულები არიან. ეტყობათ, რომ სათანადო მომზადებაც გავლილი აქვთ და სულიერი მდგომარეობაც ხელს უწყობთ.

რაც შეეხება პირველი არხის ჟურნალისტებს, ჯოჯოხეთით რომ ემუქრებიან, დარწმუნებული ვარ, ისევ საკუთარ სინდისთან თანხმობაში გააგრძელებენ მუშაობას და მუქარების გამო არ შეუშინდებიან მოვლენებისთვის თავისი სახელის დარქმევას.

პირადად მე, რასაკვირველია, მათ დიდ პატივისცემას, თანადგომას და სრულ სოლიდარობას ვუცხადებ, რადგან მგონია, სიძულვილის ლეგიონისგან წამოსულ შხამს, მხოლოდ სოლიდარობით, თანადგომით და გამხნევებით ვუმკურნალებთ და არა საპასუხო მუქარით და აგრესიით (რისი არც გამოხატვა და არც განხორციელება, რთული არაა!).

ცხადია, სოლიდარობისკენ ვერავის მოვუწოდებ, ეს ნებაყოფილობითი აქტია და საკუთარი მსოფლხედვიდან გამომდინარე, ყველა თავად წყვეტს და ირჩევს, ვის მიმართ და რა დროს გამოიჩენს თანადგომას – კაცმა რომ თქვას, საბოლოო ჯამში, ნამდვილი კოლეგიალობაც და მეგობრობაც ამას ეფუძნება. ძველი ბერძნები ამბობდნენ, ბოლოს ყველა თავის მსგავსთან მივაო. ამ საქმეში ფარისევლობა არ გამოვა – ან კანიბალს უჭერ მხარს, ან მის მსხვერპლს, ანუ ვისთანაც მსგავსებას ხედავ!

P.S. დაბოლოს. რიტორიკული შეკითხვა სიძულვილის ლეგიონის წევრებს და მათ გულშემატკივრებს – ნუთუ მართლა გენატრებათ ისეთ ქვეყანაში ცხოვრება, სადაც თქვენი გამოთქმული აზრისთვის ან გაკეთებული სიუჟეტისთვის ცხოვრებას ჯოჯოხეთად ქცევას გიქცევენ?! პაწა დაფიქრებულიყავით, არ გაწყობდეთ იქნება და ეგება!“