“პირდაპირ ვიტყვი, კახა კალაძეს ეს რაში სჭირდება?” – კახა კალაძე

თბილისის მერი, კახა კალაძე დედაქალაქში გამოკრულ სიძულვილის პოსტერებთან კავშირს უარყოფს და ამბობს, რომ “არეულობა, აგრესია, ძალადობა და ქაოსი არ სჭირდება”.

“იყო მცდელობა ამ პლაკატების ჩემ საარჩევნო კამპანიაზე პროექცია. სულ მცირე, ლოგიკა არის საჭირო. და პირდაპირ ვიტყვი, რაში სჭირდება კახა კალაძეს არეულობა, აგრესია, ძალადობა ქაოსი. მე და ჩემს გუნდს არ გვჩვევია ამ მეთოდებით ბრძოლა. განსაკუთრებით მაშინ, როცა თბილისის მოსახლეობამ, პირადად მე და ჩემს გუნდს ნდობა გამოგვიცხადა ქალაქის განვითარებისთვის, ეს არის ყველაზე დიდი კაპიტალი რაც კი გაგვაჩნია, ეს არის ჩვენი პიარიც და ჩვენი იარაღი ოპონენტებთან ურთიერთობისას.

ის სიცრუე და ცილის წამება, რასაც ეს დღეებია ვისმენთ, აზარალებს არა კახა კალაძეს ან მერიას ან მერიის უწყებებს, ზოგადად, ჩვენს ქალაქს და თრგუნავს საზოგადოებას, იწვევს ადამიანებში გაღიზიანებას.

მესმის, რომ როცა არჩევნები ახლოვდება, იმატებს ცილისწამება და შეურაცხყოფა, რაც ძალიან საგანგაშოა. იმატებს აგრესია, იმატებს ძალადობა და მინდა ვთხოვო დედაქალაქის მერიის თანამშრომლებს, ჩემს მხარდამჭერებს, ყველა გულშემატკივარს, რომ არავითარ შემთხვევაში ამ აგრესიას და ძალადობას არ უპასუხოთ აგრესიით და ძალადობით. ვაჯობოთ სიძულვილს, აგრესიას და გავაგრძელოთ საქმის კეთება სიყვარულით, როგორც გვჩვევია”,- თქვა კახა კალძემ.