“პირადად ჩემი და ჩემი ოჯახის მტრებად ჩაგთვლით” – ვის მიმართავს დავით ზურაბიშვილი

მარკ კლეიტონი, გაერთიანებული სამეფოს სრულუფლებიანი ელჩი საქართველოში: “უცხოური გავლენის გამჭვირვალობის შესახებ“ კანონპროექტზე – გაერთიანებული სამეფო სერიოზულად არის შეშფოთებული – ეს არ შეიძლება იყოს სწორი.”

პაველ ჰერჩინსკი, ევროკავშირის ელჩი საქართველოში: “ამ წამს დავასრულეთ ძალიან მნიშვნელოვანი შეხვედრა. მე თან მახლდნენ ევროკავშირის წევრი ქვეყნების ყველა ელჩი, ვინც თბილისში მდებარეობს. ჩვენ პარლამენტის თავმჯდომარის მიერ ვიყავით დაპატიჟებული, რათა აზრები გაგვეცვალა “უცხოური აგენტების” შესახებ ინიციატივაზე…მარტივი დისკუსია არ იყო. ჩვენი მხრიდან ძალიან მკაფიოდ განვაცხადეთ, რომ ეს ინიციატივა ევროკავშირის ნორმებსა და ღირებულებებს არ შეესაბამება”

მოკლედ სრულიად დასავლეთის პოზიცია ცნობილია და ცალსახაა.

მთელი ქართული სამოქალაქო საზოგადოების აზრი, პოლიტიკურად მეტად ანგაჟირებულის, ნაკლებად ანგაჟირებულის და საერთოდ არაანგაჟირებულის, ასევე ცნობილია და ცალსახაა.

მთელი ქართული პოლიტსპექტრის პოზიცია, იქნება ის ნაცი, არანაცი, ანტინაცი, კონსერვატორი, ლიბერალი, მწვანე, წითელი თუ ლეიბორისტი, ასევე ცნობილი და ცალსახაა. გამონაკლისია მხოლოდ ფაშისტები და პრორუსები, მაგრამ ეგენი ისედაც სულ ხელისუფლების მხარეს არიან, განსაკუთრებით ყველაზე ცუდ საქმეებში.

ჩემის მხრიდან კი მხოლოდ იმას დავამატებ, რომ ყველაფერ ამის მერე, თუ ვინმეს თავი მიგაჩნიათ პროდასავლელად, იძახით, რომ საქართველო ევროპაში გინდათ და ევროპა საქართველოში, მაგრამ მიუხედავად ამისა, მაინც იქნებით ამ აგენტებზე კანონპროექტის მომხრეები ნაცების, ვამპირების თუ მარსიდან ჩამოფრენილი უცხოპლანეტელების შიშით, მინდა გითხრათ რომ პირადად ჩემი და ჩემი ოჯახის მტრებად ჩაგთვლით ყველას.

შეიძლება ეს უკანასკნელი ამბავი თქვენთვის დიდი არაფერი პრობლემაა, მაგრამ შევეცდები დაგარწმუნოთ, რომ მაგაშიც ძალიან ცდებით.”