გერმანიის კანცლერი ფრიდრიხ მერცი უკრაინაში წინასწარ გამოუცხადებელი ვიზიტით ჩავიდა. კიევში ის უკრაინისთვის ათასობით დრონ-გადამჭერის მიწოდებასა და შორი მოქმედების შეიარაღების წარმოების გაზრდას დააანონსებს.
გარდა ამისა, გერმანია გეგმავს გაააქტიუროს შორი მოქმედების შეიარაღების წარმოება, რომელსაც რუსეთის ჯარების ზურგში მომარაგების ხაზებზე დარტყმა შეუძლია. ამ მიზნებისთვის უკვე დამტკიცებული საბიუჯეტო სახსრებიდან ერთი მილიარდი ევროს გამოყოფაა დაგეგმილი.
კიდევ 350 მილიონი ევრო რუსეთის თავდასხმების შედეგად დაზიანებული და განადგურებული ელექტროსადგურების შეკეთებასა და აღდგენას მოხმარდება.
„თუ რუსეთს არ შევაჩერებთ, მისი სამხედრო მანქანა ადრე თუ გვიან ჩვენ წინააღმდეგ შემობრუნდება“, — განაცხადა მერცმა კიევში ჩასვლისას.
მისი თქმით, უკრაინას უახლოეს კვირებში განსაკუთრებით სჭირდება პარტნიორების მხარდაჭერა.
„მალე ადამიანებისთვის ომის მეხუთე ზამთარი დაიწყება. რუსეთი ბომბავს ქალაქებს, საცხოვრებელ სახლებსა და თბოელექტროსადგურებს. თუმცა უკრაინელები არ აძლევენ რუსულ ტერორს მათი გატეხვის საშუალებას. დღეს პრეზიდენტ ზელენსკის ვეტყვი: თქვენ კვლავ შეგიძლიათ ჩვენი დახმარების იმედი გქონდეთ“, – განაცხადა გერმანიის კანცლერმა.
კომენტარები