საქართველოს საზოგადოებრივ საქმეთა ინსტიტუტის (GIPA) პროფესორი, გიორგი კობერიძე:
რადგან ევროპის ჩემპიონატი აქტიურად მიმდინარეობს მოდი გავიხსენოთ საინტერესო პოლიტიკური მოვლენა, რომელიც სწორედ ფეხბურთს უკავშირდება. 1969 წლის 14 ივლისს ელ-სალვადორი ჰონდურასში შეიჭრა. მიზეზი კი ფეხბურთის ორი მატჩი გახლდათ, რომელიც 1970 წლის მსოფლიო ჩემპიონატის შესარჩევებისას ტარდებოდა.
კონფლიქტს ოფიციალურად ფეხბურთის ომი ეწოდება. ყველაფერს წინ ივნისის თვეში ჩატარებული ორი მატჩი უძღოდა. ერთი ჰონდურასის დედაქალაქში ჩატარდა, ხოლო მეორე ელ-სალვადორში. ორივე შემთხვევაში გულშემატკივრების შეტაკება მოხდა, ხოლო მატჩების წინ სასტუმროში მყოფ ფეხბურთელებს ღამე არ აძინებდნენ.მეორე მატჩის შემდეგ გულშემატკივრებსა და ფეხბურთელებს შორის შეტაკებები დაიწყო, რასაც ჰონდურასის ტერიტორიაზე მცხოვრები სალვადორელი მოსახლეობის წინააღმდეგ თავდასხმების დაწყება მოჰყვა. ელ-სალვარმა 1969 წელს საჰაერო დარტყმები დაიწყო ჰონდურასზე და სახმელეთო ოპერაცია დაიწყო. დღის ბოლოს სასაზღვრო რაიონების უმეტესობის ოკუპაცია განახორციელა.საბოლოოდ, ომის მესამე დღეს საქმეში აშშ ჩაერთო და აიძულა ელ-სალვადორს დაეტოვებინა ჰონდურასის ოკუპირებული ტერიტორიები. მისი სამხედროების გაყვანას ჰონდურასში მცხოვრები სალვადორელი მოსახლეობის მიგრაციაც მოჰყვა. დაახლოებით 300 ათას ადამიანზეა საუბარი, რის გამოც სალვადორი კატასტროფულად გაღარიბდა და კრიმინალმა სწრაფად დაიწყო ზრდა.ურთიერთობა ელ-სალვადორსა და ჰონდურასს შორის დღემდე კრიტიკულია.
ჰოდა როცა ვინმე იტყვის სპორტი და პოლიტიკა რა შუაშიაო, პოლიტიკა და ისტორია სხვა რამეს გვეუბნება ხოლმე. სამწუხაროდ თუ საბედნიეროდ პოლიტიკა იქაა, სადაც ადამიანები არიან – სპორტში, ეკონომიკაში, კულტურაში თუ მითებშიც კი.
კომენტარები