ფარული მოსმენა–მიყურადების ვადები შესაძლოა გაიზარდოს – ქართული ოცნების ახალი კანონპროექტი

ქართული ოცნების დეპუტატებმა შეიმუშავეს კანონპროექტი, რომლის მიღების შემთხვევაში, ფარული საგამოძიებო მოქმედებები 9 თვემდე გახანგრძლივდება.

კანონპროექტის ავტორები არიან ირაკლი ბერაია, ალექსანდრე ტაბატაძე, ვლადიმერ ჩაჩიბაია და რატი იონათამიშვილი.

ცნობისთვის, ფარული საგამოძიებო მოქმედებები, მათ შორის სატელეფონო კომუნიკაციის ფარული მიყურადებას, საკომუნიკაციო არხებიდან ინფორმაციის მოხსნასა და ფარულ ფოტო/ვიდეო/აუდიო ჩაწერას მოიცავს.

დეპუტატები ფარული საგამოძიებო მოქმედებების შესახებ თავში, კონკრეტულად, 1433 მუხლის​ მე-12 პუნქტში, ვადებთან დაკავშირებით ცვლილებების შეტანას ითხოვენ.

მოქმედი კანონმდებლობით, ფარული საგამოძიებო მოქმედების ჩატარების შესახებ მოსამართლის განჩინება გაიცემა იმ ვადით, რომელიც საჭიროა გამოძიების მიზნის მისაღწევად, არაუმეტეს 1 თვისა.

იმ შემთხვევაში  თუ ეს ვადა საკმარისი არ აღმოჩნდება, დასაშვებია მისი გაგრძელება პროკურორის მოტივირებული შუამდგომლობის საფუძველზე, მოსამართლის განჩინებით, არაუმეტეს 2 თვის ვადით.

ვადის გახანგრძლივება მესამედაც შესაძლებელია, საქართველოს მთავარი პროკურორის შუამდგომლობის საფუძველზე, არაუმეტეს 3 თვით – ამის შემდეგ კი ვადა აღარ ხანგრძლივდება.

“ოცნების” დეპუტატების კანონპროექტის დამტკიცების შემთხვევაში,  ფარული საგამოძიებო მოქმედების 3 ეტაპად ჩატარება გახდება შესაძლებელი, თითოეული 3-თვიან ვადას ითვალისწინებს, ხანგრძლივობა კი საერთო ჯამში 9 თვეს არ უნდა აღემატებოდეს.