კორონავირუსის „ომიკრონი“ ვარიანტის გავრცელების ფონზე, სამხრეთ აფრიკაში, Pfizer-BioNTech-ის ვაქცინის ორდოზიანი კურსი ნაკლებად ეფექტური აღმოჩნდა ჰოსპიტალიზაციის პრევენციის კუთხით.
სამხრეთ აფრიკაში ჩატარებული კვლევის შედეგების თანახმად, 15 ნოემბრიდან 7 დეკემბრის ჩათვლით, იმ ადამიანებს, რომლებმაც Pfizer-BioNTech-ის ვაქცინის ორი დოზა მიიღეს და კორონავირუსი დაუდგინდათ, ჰოსპიტალიზაციის თავიდან აცილების 70%-იანი შანსი ჰქონდათ. აღსანიშნავია, რომ „დელტა“ შტამის ტალღის დროს ეს მაჩვენებელი 93%-ს შეადგენდა.
რაც შეეხება ინფექციის თავიდან აცილებას, სამხრეთ აფრიკის უმსხვილესი კერძო სამედიცინო დაზღვევის ადმინისტრატორის, Discovery Health-ის კვლევამ აჩვენა, რომ კორონავირუსით ინფიცირებისგან დაცვა 80%-დან 33%-მდე შემცირდა.
8 დეკემბერს, BioNTech-მა და Pfizer-მა განაცხადეს, რომ ლაბორატორიული კვლევების წინასწარი შედეგების თანახმად, მათი ვაქცინის 3-დოზიანი კურსი „ომიკრონი“ ვარიანტის წინააღმდეგ გამანეიტრალებელ ეფექტს უზრუნველყოფს.
ბრიტანელი მეცნიერების მიერ ჩატარებული ანალიზი ასევე ცხადყოფს, რომ კორონავირუსის საწინააღმდეგო ვაქცინის ორი დოზა „ომიკრონი“ ვარიანტით დაინფიცირების პრევენციის კუთხით საკმარისი არ არის.
ჯანდაცვის მსოფლიო ორგანიზაციაში აცხადებენ, რომ გლობალურ დონეზე კორონავირუსის „ომიკრონი“ შტამის პოტენციური გავრცელების ალბათობა მაღალია.
კომენტარები