“პატივისცემით, საქართველოდან” – წარწერა უკრაინიდან ოკუპანტისთვის გამზადებულ ჭურვზე

ფოტო – ფორმულა

საქართველოდან უცნობმა პირმა უკრაინიდან რუსეთს ჭურვზე დატანილი წარწერით შეუთვალა –  “პატივისცემით, საქართველოდან”.

“ფორმულას” ცნობით, ჭურვი მოხალისეების მიერ შექმნილი პროექტის “Your Revenge For – შენი შურისძიება” ფარგლებში გაიგზავნა, რომელიც უკრაინელების დასახმარებლად ფულადი სახსრების შესაგროვებლად არის შექმნილი, გადასარიცხი ფულის მინიმალური რაოდენობა კი 500 აშშ დოლარია.

საქართველოდან უცნობმა პირმა უკრაინული ფინანსური მხარდაჭერის მოძიების ორგანიზაციაში თანხა გააგზავნა და მიუთითა, თუ რა წარწერა სურდა, გაკეთებულიყო ჭურვზე.

როგორც პროექტის ვებ-გვერდზეა მითითებული, ჭურვზე დასატანად ნებისმიერი ტექსტის შერჩევაა შესაძლებელი, რუსეთთან დაკავშირებული ტექსტებიდან დაწყებული, დაბადების დღეების მილოცვებით დამთავრებული. აკრძალულია მხოლოდ პრორუსული, რუსეთის ქმედებების გამამართლებელი ტექსტები, სიძულვილის ენა უკრაინის ან მისი მოკავშირეების, ნებისმიერი უმცირესობის მიმართ და ასევე, დაუშვებელია რასობრივი დისკრიმინაცია.