“ქართული ოცნების” მთავრობა საქართველოს რკინიგზისთვის ახალი ლოკომოტივების მშენებლობის და კახეთში საგზაო ინფრასტრუქტურის განვითარებისთვის ჯამში 751$ მილიონის სესხს იღებს. ინფორმაციას ამის შესახებ BMG ავრცელებს.
მათივე ცნობით, აღნიშნული სესხების მიღება დაგეგმილია მსოფლიო ბანკის ჯგუფიდან (WB), აზიის განვითარების ბანკისგან (ADB) და აზიის ინფრასტრუქტურის საინვესტიციო ბანკისკან (AIIB).
372-მილიონიანი საკრედიტო დაფინანსებით, საქართველოს მთავრობა გეგმავს საქართველოს რკინიგზისთვის ახალი ლოკომოტივების შესყიდვას, ასევე ელექტრო ქვესადგურების მოდერნიზებას და მშენებლობას და რკინიგზის ინსტიტუციურ გაძლიერებას. ამავე კრედიტით იგეგმება ბადიაურიდან ჩალაუბნამდე და ჩალაუბნიდან ბაკურციხემდე ოთხზოლიანი მაგისტრალის მშენებლობა. ასევე დაგეგმილია გურჯაანიდან თელავამდე გზის მშენებლობა.
ჯერჯერობით უცნობია როგორ ნაწილდება 372 მილიონი დოლარი და თანხის რა ნაწილი დაიხარჯება საავტომობილო გზასა და საქართველოს რკინიგზაზე.
2026 წლის მაისის დასაწყისში საქართველოს რკინიგზამ განვითარების ახალი გეგმები წარადგინა, რაც მოიცავს 10 ახალი სამგზავრო შემადგენლობის, 50 ახალი ლოკომოტივის და 1500 ახალი სატვირთო ვაგონის შესყიდვას. ასევე ინფრასტრუქტურის გაუმჯობესებას და მატარებლების გადაადგილების სიჩქარის გაზრდას.
კომენტარები