„ოცნების“ ლიდერების ხორხოცი, ხაბეიშვილზე კარგად გავერთობითო, ნაადრევია…“

ანი დვალიშვილი

„ოცნების“ ლიდერების ხორხოცი, ხაბეიშვილზე კარგად გავერთობითო, ნაადრევია, რადგან კიდევ გავიმეორებთ, ხაბეიშვილი იქნება მარტო სახე და სახელი, გადაწყვეტილებებს კი „დიდი ზვიგენები“ მიიღებენ. თუმცა, ახლა „ოცნებას“ ყველაზე ნაკლებად სწორედ ის ადარდებს, ხაბეიშვილი გახდება ნაციონალების თავმჯდომარე თუ მელია, რადგან ბევრად დიდი პრობლემა საგარეო მიმართულებით არის. დასავლეთი ღია იერიშზეა გადმოსული და სტატუსის მიღების ლამის ერთადერთ პირობად, ივანიშვილისთვის ოლიგარქის სტატუსის მინიჭებასა და მისთვის სანქციების დაწესებას ასახელებენ. თუ აქამდე პარტიის წევრები ამბობდნენ, რომ სტატუსის არმიღება ტრაგედია არ იქნება, ახლა ეს პრემიერმაც თქვა, რაც იმას ნიშნავს, რომ ხელისუფლება არ აპირებს ივანიშვილს შეეხოს. ან როგორ უნდა შეეხოს, როცა რეალურად, ისევ მასზე დგას და ასე იქნება მანამ, სანამ ძალაუფლება „ქართულ ოცნებას“ ექნება.

მმართველ გუნდში დარწმუნებულნი არიან, რომ სტატუსზე უარს რომ გვეტყვიან, მოსახლეობა ქუჩაში არ გამოვა და არ გააპროტესტებს, რადგან… ადამიანები ამასაც შეეგუვნენ და ზოგადად, პოლიტიკურ ნიჰილიზმს ოპოზიცია ვერაფერს უხერხებს და ვერც მოუხერხებს, სანამ მოიქცევიან ისე, როგორც იქცევიან. ახლა ოპოზიციური პარტიების ლიდერები კი ამბობენ, ივანიშვილს იმავე მეთოდით უნდა ვებრძლოთ, როგორც თავად დაგვამარცხაო, ანუ ყველა ერთის წინააღმდეგ, მაგრამ მათ ავიწყდებათ, რომ პარტიების უმრავლესობა ნაციონალური მოძრაობის განაყოფია, ხოლი ის, ვინც არ არის, ელექტორატი არ ჰყავს. ივანიშვილმა თითოკაციანი პარტიები შემოიერთა და სასწორზე უზარმაზარი ფული დადო, რამაც საბოლოოდ იმუშავა. ფული კი ისე ჩანს, ოპოზიციურ ფლანგზე კვლავ მხოლოდ ნაციონალებს და ცოტა „ლელოსაც“ ექნება, თუმცა არა იმდენი, „ოცნების“ თუნდაც ოფიციალური შემოწირულობები გადაწონოს. ოპოზიციას დასავლეთის ზეწოლის იმედი აქვს, თუმცა უკვე ნათლად გამოჩნდა, რომ ხელისუფლება დასავლეთს არაფერში ითვალისწინებს და არც მომავალში გაითვალისწინებს… მანამდე კი, „ვარდების რევოულციის“ მე-19 წლისთავზე, ამ რევოლუციის მომხდენი პარტია უმძიმეს დღეშია. მიხეილ სააკაშვილი ოფიციალურად არაფერში ერევა, მაგრამ ეს მხოლოდ ოფიციალურად – არაოფიციალურად ის ძალიან, ძალიან გაბრაზებულია, მაგრამ ხმამაღლა არ თუ ვერ ამბობს. ისე, როცა სხვადასხვა პარტიების ლიდერებს პრეტენზიები აქვთ, სააკაშვილის მიერ ნათქვამი სიტყვები გვახსენდება – არანაირი სხვა ძალები არ არსებობენ, ვართ მე და ივანიშვილი და სწორედ ჩვენს გარშემო ტრიალებს პოლიტიკაო. ასეა ბატონებო, „ოცნება“ ივანიშვილის გარეშე და ნაციონალები სააკაშვილის გარეშე, უბრალოდ არაფერს წარმოადგენენ.