“ოცნების” გუნდში ღალატია”, “ამ გუნდში მოღალატე არ არის” – კობახიძე, წულუკიანი, “მოღალატე” და გუნდი – პარტიის მესიჯბოქსი

 კულტურის, ახალგაზრდობისა და სპორტის მინისტრი, თეა წულუკიანი გავრცელებულ ფაილებზე კომენტარს აკეთებს და ამბობს:

“ქართული ოცნების პოლიტიკური ოჯახის შიგნით არის მომხდარი ღალატი, ეს არის ფაქტი, ამიტომაც ის პოლიტიკური ავანტიურა, რომელიც არის წამოწყებული… მინდა დავიცვა ადამიანები, ვისაც სჯერა ამ ავანტიურის – იყავით ფრთხილად, ვინაიდან ჩვენ საქმე გვაქვს გაუაზრებელ პროცესთან და არ გამოვრიცხავ, რომ ის ადამიანები, ყოფილი საჯარო მოხელეები, სხვადასხვა პროფესიონალიზმითა და სისუფთავით ცნობილი ხალხი, ვისაც სჯერა ამ პროცესის, აღმოჩნდეს პოლიტიკური ავანტიურის მსხვერპლი. ეს გამოჩნდება არჩევნების შემდეგ”

პარტია ქართული ოცნების თავმჯდომარემ, ირაკლი კობახიძემ ტელეკომპანია იმედის ეთერში განაცხადა:

“ჩვენ გვქონდა ძალიან რთული მოცემულობა პარტიის შიგნით, ასე გამოვიდა თებერვალში, როდესაც მელიას მიმართ იყო კანონი აღსასრულებელი. გახსოვთ, რომ მაშინ გუნდს უღალატა კონკრეტულმა ადამიანმა. დღეს არც ირაკლი კობახიძე, არც ირაკლი ღარიბაშვილი, არც კახა კალაძე, არც ერთი პირი არ არის ჩვენი გუნდის ხელმძღვანელობაში, რომელმაც ასეთი რამ შეიძლება გააკეთოს. გუნდი არის ერთიანი, ძლიერი და აქვს თავისი ღირებულებები. მოღალატე არ არის ამ გუნდში.

აქედან გამომდინარე, ეს არის დამატებითი ფაქტორი, რატომაც ვერ გაბედავს მიხეილ სააკაშვილი საქართველოში შემოსვლას. თავის დროზეც, მელიას რომ არ ჰქონოდა რაღაც გარანტიები, ისიც ვერ გაბედავდა სამაჯურის გადაგდებასა და შემდეგ გირაოს არგადახდას. თუ მეხუთე კოლონა არ გყავს გუნდში, ასეთ დროს ძალიან რთულია ასეთი ავანტიურისტული ქმედებების დაგეგმვა. ჩვენ არ გვყავს მოღალატე გუნდში. გუნდი არის ერთიანი, აქვს ღირებულებები, გუნდი არის პრინციპული და აქედან გამომდინარე, ამ მოცემულობაში სააკაშვილს ძალიან გაუჭირდება თავისი ავანტიურისტული გეგმის განხორციელება”