“ორივე ნავალნის მოწამვლის შესახებაა” – რა ვიდეობს ავრცელებს ვახო სანაია

ორივე ნავალნის მოწამვლის შესახებაა.

ზოგს შეიძლება ნანახი გაქვთ. ვისაც არ გინახავთ, გირჩევთ, ნახოთ. ამისთვის 2 საათი დაგჭირდებათ, სამაგიეროდ, ზუსტად გეცოდინებათ, როგორ მოქმედებს სახელმწიფო ტერორიზმის მანქანა.

პუტინი იძლევა მკვლელობის შეკვეთას და სახელმწიფო იწყებს მისი დავალების შესრულებას.

ცხადია, დამკვეთს, ქვეყნის მმართველს, ესმის, რომ მსგავსი მკვლელობის დროს პირველი ეჭვმიტანილი თავადაა. მერე რა – არის მეთოდები, რომელიც მას იხსნის ამ ,,უხერხულობისგან”.

ეს არის რუსული პრაქტიკა, რომელსაც კრემლი იყენებდა და იყენებს ქვეყნის შიგნით და ქვეყნის გარეთ პოლიტიკური მკვლელობების დროს.

პირველი – მთავარია ბუნდოვანების შექმნა. იქნებ ასე კი არა, სხვანაირად იყო. მთავარია სრულიად აშკარა ამბავში პატარა ეჭვები შეიტანო. ამისთვის გამოიყენებ მოსყიდულ ექიმებს, მოსყიდულ ექსპერტებს, პროპაგანდისტებს.

შემდეგი ნაბიჯია – მსხვერპლს მიაყენო ჩრდილი, რომ ხალხს მისი მხარდაჭერის სურვილი დაუკარგო. დააბრალე ნებისმიერი რამ, მოუგონე ჭორები. ესეც ხელს შეუწყობს ბუნდოვანებას.

შემდეგ – უშუალოდ დანაშაული უნდა დააბრალო სხვას, რომ მმართველს კი არა, ვიღაც სხვას სურდა მისი სიკვდილი. ან სულაც მსხვერპლი უნდა გამოიყვანო დამნაშავედ.

მთელი მედიარესურსით, ასევე მთავრობის სხდომებზე, პარლამენტში – ყველგან იწყებ მთავარი საკითხიდან გამოგონილ თემებზე აქცენტის გაკეთებას. სულ უფრო მეტი ბუნდოვანება შემოგაქვს.

ამასობაშიც, გაქრება ყველაზე მნიშვნელოვანი მასალები, საბუთები; გაყალბდება ექსპერტიზა. პარალელურად დათესავ ჭორებს; მკვდარს ან გადარჩენილ მსხვერპლს დააბრალებ ყველაფერს. ვიღაც ხომ დაიჯერებს. ასე წვეთ-წვეთად, ცოტ-ცოტად საზოგადოების ყველა სეგმენტში აღძრავ ეჭვებს, ღირს კი ამ ყველაფრისთვის ბრძოლა. იქნებ მართლა არაა ისე, როგორც თავიდან მეგონა.

ბოლოს და ბოლოს კი საზოგადოება იღლება და რჩება ბუნდოვანება. იმარჯვებს მკვლელი.

რატომ ვწერ ამ სტატუსს. სისტემა, რომელიც მოქმედებს რუსეთში, მოქმედებს საქართველოშიც. ამ თვალსაზრისით, საქართველო იყო და არის რუსეთი.

გამოვა ვინმე, წაიკითხავს ექსპერტიზის დასკვნას და ჯერ კიდევ ვერ იჯერებენ ადამიანები, როგორ შეიძლება, ექსპერტმა დოკუმენტები გააყალბოს;

გამოვა ვინმე, მისცემს ჩვენებას და საზოგადოებაში ბევრი ვერ იჯერებს, რომ მოწმე ტყუილს იტყვის;

გამოვა გამომძიებელი და წაიკითხავს გაყალბებულ საქმეს და ვერ იჯერებს ხალხი, როგორ შეიძლება, რომ ეს იკადროს ვინმემ.

გამოვა მოსამართლე, ილაპარაკებს აბსურდს და ვერ იჯერებს საზოგადოების გარკვეული ნაწილი, რომ ეს მოსამართლე მოსყიდულია;

ამას მოჰყვება ხელისუფლების დაქირავებული ჟურნალისტების აღვირახსნილი პროპაგანდა, ხან პირდაპირ, ხან შეფარვით. ამას დაუმატეთ საზოგადოებისთვის ,,პატივსაცემი” მოსყიდული ნაძირლების – ,,ინწელიგენციის” სატელევიზიო ეთერებში მიწვევა, სადაც მაღალფარდოვანი სიტყვებით ყველაფერს გააპრავებენ – დაველოდოთ გამოძიებას, ამ სტილში. ან ქვეყანას ხომ არ გადავაყოლებთ.

სხვათა შორის, პრაქტიკა აჩვენებს, რომ ოპოზიციაშიც ყოველთვის მოიძებნება ხალხი, რომელიც ხელს წააშველებს ხელისუფლებას.

თანდათან ახლობლებშიც ბლომად ამოიცნობთ მოგზავნილებს, გამყიდველებს. ბევრი ,,გულშემატკივარია” ხოლმე ხაზზე შესაბამის სამსახურებთან.

ერთი სიტყვით, მთავარია ბუნდოვანება. წმინდა ბუნდოვანება.

ასეთია რუსული მეთოდი.

●

მკვლელობის შემდგომ ჩადენილი ხელმეორე მკვლელობის კლასიკური რუსული მაგალითი ბოლოს 2021 წლის ივლისში ვნახეთ – ლექსო ლაშქარავას ვგულისხმობ. ცხედრის გატაცება; ჭორები; დისკრედიტაცია; ნარკოტიკების თემის შემოტანა; პროპაგანდა; ,,ინწელიგენცია”; ექსპერტები, სისხლის სამართლის ყველა რეზონანსულ საქმეს რომ ეტმასნებიან და ხელისუფლების სასარგებლოდ აფუჭებენ…. და ასე შემდეგ და ასე შემდეგ. ყველა კომპონენტი აამოქმედეს. ბუნდოვანება, ბუნდოვანება, ბუნდოვანება.

შედეგი რა გვაავს – 5 ივლისის დამკვეთი ძალაუფლებაშია, მკვლელები თავისიფალი არიან, ლექსო მკვდარია, საზოგადოება დაბნეული, ეჭვებით დამძიმებული და დაღლილია.

ზუსტად ესაა რუსეთი.