ოპოზიციის ხვალინდელი აქციის მიზანია, ხალხს ზეიმი ჩააშხამონ – ზაალ ანჯაფარიძე

ანალიტოკოსი ზაალ ანჯაფარიძე:

,,ვცდილობ ემოციებისგან დავიწრიტო, ვიდრე გეტყოდეთ როგორ ვუყურებ და აღვიქვამ რადიკალების ხვალინდელ აქციას.

საქართველოში რა თქმა უნდა ყველას (ვიმეორებ ყველას!) აქვს შეკრება მანიფესტაციის და გამოხატვის თავისუფლება, კონსტიტუციით გარანტირებული – ერთი მნიშვნელოვანი დათქმით -კანონის და კონსტიტუციის ფარგლებში! სახელმწიფოს და მის სტრუქტურებს კი ასევე აქვთ კანონით და კონსტიტუციით მინიჭებული უფლება აღკვეთონ კანონს მიღმა გასული ნებისმიერი აქცია, ვისგანაც არ უნდა მოდიოდეს.

ოპოზიციის ხვალინდელი აქცია და მისი დამთხვევა ეროვნული ზეიმის დამოუკიდებლობის დღის აღნიშვნასთან, სავსებით გასაგები მიზნით, რომ ხალხს ზეიმი ჩააშხამონ, არ თავსდება არაფერში.

ვერ ექნება მას ვერც მორალური ვერც რაიმე სხვა გამართლება. მათ სავსებით შეეძლოთ გაემართათ აქცია სხვა ჩვეულებრივ დღეს და რუსთაველზე სცენასაც დადგამდნენ სხვა ატრიბუტებსაც. მაგრამ სხვაგვარად გადაწყვიტეს და თავად იმსჯელეთ რატომ და რისთვის.

ოპოზიციას რომ სერიოზული გეგმა ჰქონდეს, ის 26 მაისის აქციას, თუნდაც თავის მომხრეებისთვის რაღაც მნიშვნელოვანის და ახალის სათქმელად გამოიყენებდა. მათი განცხადებები კი გვაჩვენებს ერთ რამეს – არაფერი ღირებული მათ სათქმელი ხალხისთვის არა აქვთ. ეს აქცია კი, როგორც თავად წამოსცდებათ ხოლმე, ძირითადად გამიზნულია იმისათვის, რომ მათ გარე კურატორებს და სპონსორებს აჩვენონ, რომ ჯერ კიდევ ცოცხლობენ.“