სინდისის პატიმრების მშობლებმა რუსთაველის გამზირიდან “ქართული ოცნების” პოლიტიკურ ოპონენტებს საგანგებოდ მიმართეს – რეჟიმის ტყვეების ოჯახის წევრები ოპოზიციურ პარტიებს სამი მთავარი მიზნის გარშემო კონსოლიდაციისკენ მოუწოდებენ.
კონკრეტულად, ოთხ კედელში გამოკეტილი ახალგაზრდების ნათესავები მოითხოვენ, რომ ოპოზიციამ თვითმმართველობის არჩევნებს ბოიკოტი გამოუცხადოს და როგორც სინდისის პატიმრების გათავისუფლებისთვის, ასევე ხელახალი არჩევნების დასანიშნად იბრძოლოს.
პირველი მოწოდება ეხება პოლიტიკურ პარტიებს, ყველა პროდასავლურ და პროევროპულ პარტიას მოვუწოდებთ, ყოველგვარი წინაპირობის გარეშე გაერთიანდნენ მთავარი სამი მიზნის გარშემო – ახალი არჩევნები, პოლიტიკური და სინდისის პატიმრების გათავისუფლება და ბოიკოტი ადგილობრივი თვითმმართველობის არჩევნებს.
მეორე, ყველა უმაღლესი სასწავლებლის სტუდენტებს გთხოვთ და მოგიწოდებთ, გამოდით ქუჩაში და გააპროტესტეთ ქვეყნის პოლიტიკური კურსის ევროპიდან რუსეთისაკენ ცვლილება, დრაკონულ-სადამსჯელო კანონების მიღება, თქვენი თანატოლების წამება. საქართველოში დასრულდა დემოკრატია და ფესვებს იმაგრებს ტოტალიტარიზმი…
მოგიწოდებთ და გთხოვთ საქართველოს მოსახლეობას, ვიდრე დიქტატურისა და ტირანიის საცეცები თქვენამდე არ მოსულა, აიმაღლეთ ხმა და გააპროტესტეთ ქვეყნის რუსიფიკაცია, არჩევნების გაყალბება და პოლიტიკური პატიმრების არსებობა. გამოდით გარეთ.” – განაცხადეს სინდისის პატიმრების მშობლებმა.
ასევე, საქართველოში მოღვაწე ბიზნესმენებს მოგიწოდებთ, ნუ გახდებით ავტორიტარული რეჟიმის ყულაბა, ნუ გაამდიდრებთ რეჟიმის კორუმპირებულ ჩინოვნიკებს. რაც უფრო მეტად გაჩუმდებით, მით უფრო მეტის გადახდა მოგიწევთ თვითმარქვია რეჟიმისთვის”. – განაცხადეს სინდისის პატიმრების მშობლებმა.
გისოსებს მიღმა გამომწყვდეული ახალგაზრდების ოჯახის წევრები აანონსებენ, რომ იმ შემთხვევაში, თუ “ქართული ოცნება” მათ მოთხოვნებს პოლიტპატიმრების გათავისუფლებისა და ხელახალი საპარლამენტო არჩევნების დანიშვნის თაობაზე არ დააკმაყოფილებს, მაშინ პროტესტის უფრო მკაცრ ფორმებს – სახელმწიფო დაწესებულებების პიკეტირებას, საერთაშორისო მაგისტრალების გადაკეტვას და კორუმპირებული ჩინოვნიკებისათვის დისკომფორტის შექმნას მიმართავენ.
კომენტარები