დაავადებათა კონტროლის ეროვნული ცენტრის ინფორმაციით, 13 იანვრის მდგომარეობით, ქვეყანაში ლაბორატორიულად “ომიკრონის” 1 009 შემთხვევაა დაფიქსირებული.
გასულ 24 საათში “ომიკრონი” კიდევ 58 ადამიანს გამოვლინდა.
ეპიდემიოლოგები ვარაუდობენ, რომ უახლოეს დღეებში დელტა შტამს ახალი მუტირებული ქვეტიპი ჩაანაცვლებს. გამოსავალს ექიმები მხოლოდ ვაქცინაციის გააქტიურებაში და რეკომენდაციების მაქსიმალურ დაცვაში ხედავენ.
პროფესორი, მედიცინის აკადემიური დოქტორი მაკა ბულეიშვილის თქმით, გახშირდა შემთხვევები, როდესაც პაციენტს 3-6 და 1 თვის წინაც კი გადატანილი ჰქონდა კოვიდი და ვირუსის სიმპტომები ხელმეორედ აღენიშნებათ.
“არის ძალიან არასასიამოვნო ფაქტები და ხშირია ასევე, როდესაც რაღაც უახლოესი პერიოდის წინ გადატანის შემთხვევაში, ეს შეიძლება იყოს 6 თვე, 3 თვე და არის ასევე 1 თვის გადატანის შედეგადაც, როდესაც ადამიანებს ისევ აღენიშნებათ მსგავსი სიმპტომები და ცხადია ეს შემდგომში უკვე დადასტურებული არის ტესტირების საფუძველზე.
სამწუხაროდ ხშირ შემთხვევაში ვხედავთ, რომ არასერიოზულად ეკიდება ჩვენი მოსახლეობა აღნიშნულ შტამს. “ომიკრონს” ახასიათებს სუსტი სიმპტომები, მაგრამ ჩვენ არ უნდა დაგვავიწყდეს ის ფაქტიც, რომ ყველა რესპირატორული დაავადების მსგავსი სიმპტომი, ყველა ვირუსული დაავადების მსგავსი სიმპტომი, ყველა ვირუსული ინფექცია, თუ კი ადამიანს რაიმე ქრონიკული დაავადება გააჩნია, ან აქვს დაბალი იმუნური სისტემა, ასეთ შემთხვევაში არასწორად მართვის და მისი არადროულად სამედიცინო დაწესებულებაში მიმართვიანობის შემთხვევაში, შესაძლებელია ჩვენ მივიღოთ საკმაოდ დიდი რაოდენობით შემდგომში პაციენტების,”- ამბობს რუსთავი 2-თან მაკა ბულეიშვილი.
კომენტარები