ოკუპირებულ აფხაზეთში მოსკოვის ვნუკოვოს აეროპორტიდან პირველი რეისი განხორციელდა. ოკუპირებულ ტერიტორიაზე უკანონოდ ამოქმედებული აეროპორტიდან რეგულარული საერთაშორისო ფრენების განხორციელებასთან დაკავშირებით, პროტესტი გამოითქვა საქართველოს სამოქალაქო ავიაციის სააგენტოს მხრიდან. სააგენტოს შეფასებით, საჰაერო მიმოსვლის განხორციელება გარდა იმისა, რომ წარმოადგენს კანონმდებლობის დარღვევას, საფრთხეს უქმნის საავიაციო და მგზავრთა უსაფრთხოებას.
“ნებისმიერი ავიაკომპანიის მიერ საერთაშორისო საჰაერო მიმოსვლის განხორციელება ოკუპირებულ აფხაზეთში უკანონოდ გახსნილი აეროპორტიდან, რომელიც არ არის სერტიფიცირებული საქართველოს სამოქალაქო ავიაციის სააგენტოს მიერ და სადაც, ქართული მხარე მოკლებულია შესაძლებლობას უზრუნველყოს საავიაციო უსაფრთხოებაზე და უშიშროებაზე ზედამხედველობა, წარმოადგენს როგორც საერთაშორისო ნორმების, ისე საქართველოს კანონმდებლობის (კანონი ოკუპირებული ტერიტორიების შესახებ) დარღვევას.
იმ პირობებში, როდესაც აფხაზეთის რეგიონი ოკუპირებულია, საქართველოს საავიაციო ხელისუფლება მოკლებულია შესაძლებლობას, უზრუნველყოს საავიაციო უსაფრთხოებაზე და უშიშროებაზე ზედამხედველობა, ადგილზე შეაფასოს აეროდრომის ტექნიკური მდგომარეობა და მისი ვარგისობა ფრენების უსაფრთხოების და საავიაციო უშიშროების უზრუნველყოფის თვალსაზრისით. შესაბამისად, საჰაერო მიმოსვლის განხორციელება უფლებამოსილი ორგანოს მიერ გაცემული აეროდრომის ვარგისობის სერტიფიკატის არმქონე აეროპორტიდან, გარდა იმისა, რომ წარმოადგენს კანონმდებლობის დარღვევას, საფრთხეს უქმნის საავიაციო და მგზავრთა უსაფრთხოებას.” – ნათქვამია სააგენტოს განცხადებაში.
სოხუმში ფრენების დაწყებას ოცნების მთავრობიდან ეკონომიკის მინისტრი ლევან დავითაშვილი გამოეხმაურა. მისი თქმით, საქართველო აეროპორტის საერთაშორისო ნორმების დარღვევით ოპერირებას გმობს.
“ჩვენი პოზიცია ცალსახაა – საქართველო აეროპორტის საერთაშორისო ნორმების დარღვევით ოპერირებას გმობს! ეს მხოლოდ ჩვენი პოზიცია არ არის – ამას მხარს სამოქალაქო ავიაციის საერთაშორისო ორგანიზაცია ICAO უჭერს. ჩვენ ICAO-სთან მჭიდრო ურთიერთობა და თანამშრომლობა გვაქვს. ეს ICAO-ს პრინციპებს ეწინააღმდეგება. ასევე ეწინააღმდეგება “ოკუპაციის შესახებ“ კანონს.
როცა ჩვენი სამოქალაქო ავიაციის სააგენტოს მხრიდან საერთაშორისო ნორმების შესაბამისად შემოწმება, მათ შორის უსაფრთხოების ნორმების შეფასება ვერ ხდება, ამას ICAO არ აღიარებს.
საუბარია რამდენიმე სანქცირებული კომპანიის ოპერირებაზე, მაგრამ გვესმის, რომ ეს ჩვენს ძალებს აღემატება, თუმცა ჩვენი პოზიცია საერთაშორისო თანამეგობრობის წინაშე არის ძალიან მკაფიო,” – განაცხადა ლევან დავითაშვილმა.
აფხაზეთის საოკუპაციო რეჟიმი კი საქართველოს ორმაგ სტანდარტებით მოქმედებაში ადანაშაულებს და ურჩევს რომ რეალობას შეეგუოს.
“საქართველომ, საერთაშორისო სამართალზე დაყრდნობით, ჩვენი აეროპორტი უკანონოდ გამოაცხადა, თუმცა კანონი ხალხისთვის და ხალხისთვის უნდა მუშაობდეს. ადამიანების გადაადგილების, მათი კომფორტის საკითხი – ეს არის მთავარი და ჩვენ ამას რუსეთთან ერთად და რუსეთის დახმარებით ვახორციელებთ. და საქართველო ამას უნდა შეეგუოს,” – განუცხადა ჟურნალისტებს ოკუპირებული აფხაზეთის დე ფაქტო უშიშროების საბჭოს მდივანმა რაულ ლოლუამ.
ლოლუას თქმით, თავად საქართველოს არ მოსწონს, როცა ზოგიერთი დასავლური ქვეყანა მისი სუვერენული უფლებების განხორციელების შეზღუდვას ცდილობს, გარკვეული კანონების მიღებაში ან არმიღებაში, თუმცა აფხაზეთთან მიმართებით იგივე მიდგომებს იყენებს.
“როდესაც საქმე აფხაზეთს ეხება, საქართველო იგივე მიდგომებს იყენებს… აი, ორმაგი სტანდარტები. ჩვენ ჩვენი გზით მივდივართ, მაგრამ საქართველო წარსულში რჩება, ის უარს ამბობს თანამედროვე რეალობის მიღებაზე,” – განაცხადა ლოლუამ.
წყარო – მთავარი არხი
კომენტარები