მსოფლიოს პირველი ჩოგანი ნოვაკ ჯოკოვიჩი ავსტრალიაში რჩება, მაგრამ ჯერ არავინ იცის, შეძლებს თუ ვერა ავსტრალიის ღია პირველობაზე თამაშს. პრესტიჟული ტურნირის დაწყებამდე – 17 იანვრამდე, სერბ ჩოგბურთელს სავარაუდოდ კიდევ მოუწევს სავიზო საკითხზე განმარტებების გაკეთება და გამორიცხული არაა, საქმე არა თუ ვიზის გაუქმებამდე, არამედ სპორტსმენისადმი გაცილებით მძიმე ბრალდების წაყენებამდეც მივიდეს. ავსტრალიური გამოცემების ცნობით, არსებობს ეჭვი, რომ ჯოკოვიჩმა მელბურნში მოსახვედრად, სავიზო ანკეტის შევსებისას იცრუა და გააყალბა უმნიშვნელოვანესი დოკუმენტი. თუ ეს ვარაუდი დამტკიცდა, სერბ ჩოგბურთელს სისხლისსამართლებრივი დანაშაულის ბრალდებას წაუყენებენ და შესაძლოა ერთწლიანი პატიმრობაც დაემუქროს.
ბოლო დღეებში გავრცელებული ინფორმაციით, ჯოკოვიჩმა ანკეტაში არ მიუთითა ყველა ის ქვეყანა, რომლებშიც იმყოფებოდა მელბურნში ჩაფრენამდე, ბოლო თოთხმეტი დღის განმავლობაში. ეს კი ერთ-ერთი საფუძველი შეიძლება გახდეს, მინიმუმ, ვიზის გასაუქმებლად. ავსტრალიის ემიგრაციის მინისტრს აქვს უფლება, ასეთი შემთხვევის დროს, ერთპიროვნულად მიიღოს გადაწყვეტილება დეპორტირების შესახებ.
ავსტრალიის საზღვრის დაცვის სამსახურისთვის წარდგენილ დეკლარაციაში სერბმა ჩოგბურთელმა ჩაწერა, რომ მელბურნში ჩავიდა ესპანეთიდან, არაბეთის გაერთიანებული საემიროების გავლით და იქამდე ორი კვირის განმავლობაში – 22 დეკემბრიდან 5 იანვრამდე, სხვა ქვეყანაში არ ყოფილა. არადა სოციალურ ქსელებში არსებობს პუბლიკაციები, ნოვაკის მიერ ბელგრადში 25 დეკემბერს გამართულ ხალხმრავალ ღონისძიებაში მონაწილეობაზე, ხელბურთელ პეტარ ჯორჯიჩთან ერთად.
ჯოკოვიჩის წინააღმდეგ გამოსაყენებელ არგუმენტთა შორის, დიდი ალბათობით, მოხვდება სხვა ღონისძიებებიც. მათ შორის, სერბეთის საფოსტო სამსახურის საზეიმო მიღება, ბავშვების დაჯილდოვების ცერემონიალი თავის საჩოგბურთო ცენტრში და ფრანგულ გამოცემა „ეკიპთან” ინტერვიუ და ფოტოსესია. ეს ღონისძიებები გაიმართა 17 და 18 სექტემბერს. არადა ნოვაკ ჯოკოვიჩისთვის ავსტრალიის მთავრობის მიერ სავიზო გამონაკლისის დაშვება ეფუძნებოდა 16 დეკემბრით დათარიღებულ საბუთს – სპორტსმენის დადებით PCR-ტესტს. სწორედ ახლადგადატანილი კოვიდი იყო ის არგუმენტი, რომელიც არავაქცინირებულ ჩოგბურთელს ავსტრალიის ტერიტორიაზე მოხვედრაში უნდა დახმარებოდა. თითქოს ყველაფერი მოგვარდა და ნოვაკ ჯოკოვიჩი მელბურნში დაიმედებული ჩაფრინდა, მაგრამ საზღვრის დაცვის სამსახურმა გამონაკლისისთვის წარმოდგენილი საბუთები საკმარისად არ ჩათვალა და სერბი კარანტინ-სასტუმროში გადაიყვანა. ნოვაკის ადვოკატებმა საქმე მელბურნის სასამართლოში გაასაჩივრეს და 10 ივნისს, სასურველი ვერდიქტიც მოისმინეს ავსტრალიელი მოსამართლისგან – ნოვაკს სავიზო შეზღუდვა მოეხსნა.
ავსტრალიის ემიგრაციის სამინისტრო ამ თემაზე აქტიურად მუშაობს და სავარაუდოდ, საბოლოო გადაწყვეტილებასაც მალე მიიღებს. გამორიცხული არაა, ემიგრაციის მინისტრი პირადად შეხვდეს ნოვაკ ჯოკოვიჩს. მელბურნში კი მსოფლიოს პირველი ჩოგნის გულშემატკივრები დროდადრო აქციებს მართავენ და ჯოკოვიჩის ავსტრალიის ღია პირველობაზე თამაშს მოითხოვენ.
წყარო – რადიო თავისუფლება
კომენტარები