ამნისტიის კანონი შეეხება ნიკა მელიასაც, თუმცა ის მიღწეულ შეთანხმებას იწუნებს. მასთან შესახვედრად, ცოტა ხნის წინ, რუსთავის მე-12 დაწესებულებაში ადვოკატები შევიდნენ. გიორგი კონდახიშვილმა ჟურნალისტებთან საუბრისას განაცხადა, რომ მას ჯერ არ აქვს ინფორმაცია, დათანხმდება თუ არა ნიკა მელია ევროკავშირის მიერ შეთავაზებულ გირაოს.
„იქმნება რაღაც, გაუგებარი მოლოდინები ამ საქმესთან დაკავშირებით. დეტალებზე ვერ დაგელაპარაკებით. ჩვეულებრივად, უნდა შევხვდეთ ჩვენს მეგობარს, რომელიც უკანონო, პოლიტიკურ პატიმრობაშია. დეტალებზე შეხვედრის შემდეგ ვისაუბრებთ“, – აღნიშნა ნიკა მელიას ერთ-ერთმა უფლებადამცველმა, გიორგი კონდახიშვილმა.
ოპოზიციის ნაწილში, მოლოდინი, რომ ნიკა მელია დათანხმდება ევროპელი პარტნიორების შეთავაზებას, მას შემდეგ გაჩნდა, რაც „ნაციონალური მოძრაობის“ ხელმძღვანელი სასჯელაღსრულების დაწესებულებაში „ლელოს“ ლიდერმა, მამუკა ხაზარაძემ მოინახულა.
თავდაპირველად, ნიკა მელია ამბობდა, რომ იმ შემთხვევაში დათანხმდებოდა გირაოს, თუ პარლამენტიდან ამნისტიის შესახებ კანონპროექტს გამოიწვევდნენ.
სავარაუდოდ, ნიკა მელიასთან ადვოკატების შეხვედრა ერთი საათი გაგრძელდება.
უქმე დღეების დასრულების შემდეგ, ამნისტიის ორ კანონპროექტზე საკომიტეტო განხილვები დაიწყება. ამ დრომდე, მმართველი პარტია და ოპოზიცია საერთო ფორმულირებაზე ვერ თანხმდებიან. ამნისტიის შესახებ კანონპროექტი ჯერ მმართველმა გუნდმა დაარეგისტრირა, შემდეგ კი, ოპოზიციამ ალტერნატიული პროექტი წარადგინა. შარლ მიშელის დოკუმენტის მიხედვით, ამნისტია, 19-21 ივნისის მოვლენებზე, ყველა დარღვევასა და ყველა დაკავებას უნდა შეეხოს.
კომენტარები