ნიკა გვარამიას წერილი ციხიდან

პოლიტპატიმრებს, ვინც არ დათმო სამშობლოს ინტერესი და საკუთარი სიმართლე!;

რუსთაველის ბრწყინვალე საზოგადოებას, ვინც შეინარჩუნა და წამით არ ჩააქრო სამშობლოსთვის ბრძოლის რუსთაველზე დანთებული პატრიოტული ცეცხლი;

კრიტიკულ ტელევიზიებს, უდიდესი თანადგომით და სიყვარულით, ვინც წამით არ შეწყვიტა სიმართლის მსახურება და ჩვენი გამხნევება, მათ შორის, ჩემს მთავარ არხელებს, ვინც დახურული არხის პირობებშიც კი ერთ-ერთ ყველაზე გავლენიან მედიად ინარჩუნებს მთავარის სახელით მოქმედ ფბ პეიჯს. მინდა მათაც და საზოგადოებასაც დავპირდე, რომ 2026 წელი სხვა გამარჯვებებთან ერთად, მთავარის აღდგენის მომტანიც იქნება;

ჩემს კოალიციას „ცვლილებებისთვის“, ვინც უმძიმესი წელი გადაიტანა და, მიუხედავად ამისა, გაძლო და გაძლიერებული გამოვიდა ამ გამოწვევებიდან, რაც თითოეული წევრის უმძიმეს პრობლემებთან პირადად გამკლავებისა და ყველას ერთად გუნდური თამაშის დამსახურებაა;

სამოქალაქო საზოგადოებას, რომელიც ფორმალურად გააუქმეს, მაგრამ მაინც ვერაფერი დააკლეს და კვლავ ქვეყნის სადარაჯოზე და თითოეული მოქალაქის მთავარ შემწედ და მეოხად რჩება კვლავ;

ჩვენს საქართეველოს, ჩვენს საუკეთესო და განუმეორებელ ქვეყანას, რომელიც ევროკავშირის წევრობას იმსახურებს და მიიღებს კიდეც, რაც არ უნდა ეცადოს მავანი და წინ აღუდგეს ჩვენი ისტორიული ამოცანის შესრულებას;

ჩვენს შესანიშნავ, ნიჭიერ და კეთილ ხალხს, რომელიც იბრძვის ბედნიერებისთვის და ნათელი მომავლისთვის და მოიპოვებს კიდეც;

ვულოცავ ყველას, განურჩევლად პარტიულობისა, არც ერთ დედას და მამას არ ვუსურვებ შვილებს ციხეში, არც ერთ მეუღლეს თავისი მეორე ნახევარს ციხეში, არც ერთ ბავშვს, თავის დედ-მამას ციხეში. არც ერთს და არც არავის, ქოცების ჩათვლით, რა თქმა უნდა. ყველას ვულოცავ და ვუსურვებ ბედნიერებას და ჯანმრთელობას;

ვულოცავ დიდებულ ქართველ ქალებს, ჩემ საყვარელ ელენეს (ლაკას), უბრწინვალეს მზიას, რეჟიმის ტყვე ქალებს – ევა შაშიაშვილს და თამარ მეარაყიშვილს. ვუსურვებ ჯანმრთელობას და მალე თავისუფლებას;

ვულოცავ ჩემს შვილებს გიკოს, სანდროს და ქექეს, ვინც არანორმალურად მენეტრება და ვისზეც ყველაზე მეტად ვღელავ. განსაკუთრებით სანდროს, რომელიც წელს აბარებს და ყველაზე მეტად ახლა ჭირდება ჩემი გვედში დგომა. მამიკო, ბოდიშს გიხდი საჯაროდ, იმისთვის, რომ რისთვისაც წლები ერთად ვემზადებოდით, ისე გამოვიდა, რომ მარტო გიწევს ყველა სიძნელის დაძლევა. ვიცი გამოგივა! და ამ ახალ წელს მხოლოდ ცოტა გამართლებას გისურვებ, რაც ყველა აბიტურიენტს სჭირდება, დანარჩენს თავად შეძლებ. ვულოცავ ჩემს სოფოს – ჩემს მთავარ სიყვარულს, ჩემს მთავარ მეგობარს, ჩემს მთავარ გულშემატკივარს და ჩემს მთავარ იმედს! დუდი, მიყვარხარ ძალიან და აბა შენ იცი – წარმატებები წელს და ყველა სურვილის ასრულება;

ვულოცავ ჩემს უახლოეს ადამიანებს, ჩემს ძმებს, დებს, ნათესავებს, მეზობლებს და მეგობრებს – იმათ, ვინც ჩემს პატარა საქართველოს შეადგენს და ვინც არის ჩემთვის სამშობლო – არა გეოგრაფია, არამედ ნავთსაყუდელი და სიმშვიდის და ბედნიერების ერთადერთი ადგილი სამყაროში;

ვულოცავ საკუთარ თავსაც, რომ ასეთი შესანიშნავი ადამიანების გარემოცვაში, ასეთ შესანიშნავ ქვეყანაში მომიწია ცხოვრება.

განსაკუთრებით ვულოცავ საკუთარ თავს იმას, რომ მაქვს პატივი და ფუფუნება, ვიბრძოლო სამშობლოსთვის, თან ასეთ ბრწყინვალე თანამებრძოლებთან და თანამოაზრეებთან ერთად!

სიმშვიდეს ვუსურვებ ჩვენს თავს და სამართლიანობას – „ არ იქნება სიმშვიდე, არ იქნება სამართლიანობა“! მისურვებია ყველასთვის, რომ არასდროს არ შეგვეწყვიტოს ბედნიერებისკენ სწრაფვა, რამეთუ ეს არის მთავარი, რაც ღმერთმა გვარგუნა და რაც გვევალება, როგორც ადამიანებს, ღმერთის სახედ და ხატად შექმნილებს!

მიყვარხართ, მეამაყებით და მეიმედებით!

წარმატებები, ჯანმრთელობა, სიყვარული და გამარჯვება!