„ნაცმოძრაობა“ აქციას მართავს მაშინ, როდესაც ქვეყანაში მძვინვარებს კორონავირუსი, აუცილებელია სასწრაფოს მანქანების გადაადგილება – ანრი ოხანაშვილი

საზოგადოებას აუცილებლად უნდა ვუთხრათ, რომ ეს ხალხი აქციას მართავს მაშინ, როდესაც ქვეყანაში მძვინვარებს კორონავირუსი, აუცილებელია სასწრაფოს მანქანების გადაადგილება, აუცილებელი ჩვენი მოქალაქეების გადაადგილების შეფერხების თავიდან აცილება და ამ ყველაფრის მიუხედავად, მათ არ აინტერესებთ საზოგადოების აზრი, არ აინტერესებთ საზოგადოებრივი უსაფრთხოება, არაფრად მიიჩნევენ კოვიდ-უსაფრთხოებას, – ამის შესახებ ანრი ოხანაშვილმა „იმედის“ ეთერში განაცხადა.

პარლამენტის იურიდიული კომიტეტის თავმჯდომარის თქმით, აქედან გამომდინარე, „ნაცმოძრაობა“ სამართლებრივი სივრციდან გადის.

„ჩვენ მოსმენილი გვაქვს ამ ადამიანების მიზანი, მათი ბელადის მოწოდება, რომ დაიხსნან ციხიდან და 10 დღეში თურმე დაამხობს ხელისუფლებას და ასევე ის ჩანაწერი, რომელიც სუს-მა გამოაქვეყნა, რომელშიც გეგმავენ როგორ შეიძლება განხორციელდეს პიკეტირება, რომელიც შეიძლება მასობრივ მღელვარებაში გადაიზარდოს. ეს არის მათი სცენარი და ამის მორიგი დემონსტრაციაა დღეს, თუმცა დარწმუნებული ვარ, რომ პოლიცია კანონის შესაბამისად გასცემს პასუხს ამ ბინძურ პროვოკაციებს“, – განაცხადა ოხანაშვილმა.

„ნაციონალური მოძრაობის“ ორგანიზებით, მტკვრის მარჯვენა სანაპიროზე საავტომობილო მოძრაობა შეჩერებულია. აქციაში მხოლოდ „ნაცმოძრაობა“ და მისი მხარდამჭერები მონაწილეობენ.