დავრჩები პარტიულ თანამდებობაზე. არსად არ ვაპირებ წასვლას, რადგან ყველამ უნდა ვიფიქროთ მიშას გადარჩენაზე. ეს არის ჩვენი გამაერთიანებელი და ამომავალი წერტილი, – ამის შესახებ „ნაციონალური მოძრაობის“ ფოთის ორგანიზაციის ხელმძღვანელმა, დარეჯან ცხვიტარიამ განაცხადა.
დარეჯან ცხვიტარია გამოეხმაურა „ნაციონალური მოძრაობის“ თავმჯდომარის, ლევან ხაბეიშვილის განცხადებას, სადაც ის ამბობს: „მიხეილ სააკაშვილს თუ გაუშვებენ, მე და „ნაციონალური მოძრაობა“ მზად ვართ, ამის სანაცვლოდ დავტოვოთ საკრებულო, პარლამენტი, „ნაციონალური მოძრაობის“ ცენტრალური ოფისი გავუფორმოთ ბიძინა ივანიშვილს და ჩვენი ქვეყნისთვის ბრძოლა დავიწყოთ მინუსებიდან“.
დარეჯან ცხვიტარიას თქმით, ხაბეიშვილის განცხადება ძალიან ხმამაღალია.
„თვითონ მელიამ გააკეთა განცხადება, რომ ჩვენ არ მივდივართ პარტიიდან, ვინაიდან დღეს უმძიმეს მდგომარეობაში იმყოფება მიხეილ სააკაშვილი. ყველამ ერთად უნდა ვაკეთოთ საქმე მიხეილ სააკაშვილის გადასარჩენად. მე ვარ ამ პარტიის ერთ-ერთი დამფუძნებელი და გუშინ რომ მოვიდა, იმას რა უნდა დავუთმო. ეს პარტია ჩემთვის ოჯახია, ჩემი ქვეყნის მომავალია მიხეილ სააკაშვილის ლიდერობით. არსად არ ვაპირებ წასვლას, დრო გვაჩვენებს. ახლა პირველია მიხეილ სააკაშვილის გადარჩენა და შემდეგ მოდის სხვა დანარჩენი.
ხაბეიშვილი ჯერ კიდევ არ არის დარეგისტრირებული პარტიის თავმჯდომარედ და ამხელა უფლება მისცე საკუთარ თავს, ცოტა სხვანაირად მეჩვენება. მე, დარეჯან ცხვიტარიას, შემიძლია სიცოცხლე გავწირო მიხეილ სააკაშვილისთვის ამ წუთას, მაგრამ ამხელა პარტიის სახელით რაღაცა ვთქვა, ამის უფლება არავის აქვს. ასეთ შემთხვევაში ვიღაცას უნდა დაეკითხო. პირადად მე, შემიძლია ყველაფერი გავაკეთო, მაგრამ ამხელა პარტიაა, რომელმაც ხვალ ხელისუფლება უნდა შეცვალოს და ასეთი განცხადებების გაკეთებისას ვიღაცას მაინც უნდა დაეკონტაქტოს.
ლაპარაკობ ერთს და აკეთებ მეორეს, ეს მიუღებელი პროცესია. ამბობ, არავის არ შევეხებით, ყველა უნდა დარჩეს პარტიაშიო, მაშინ ეს სიტყვა უნდა გამართლდეს. თუ სიტყვას ფასი არ ექნება, მაშინ სხვა პროცესები განვითარდება. ყველაფერი ასე არ არის, აირჩიეს და ამით დამთავრდა, პროცესები განვითარდება. რასაც ამბობ, იმის პასუხისმგებელი უნდა იყო“, – განაცხადა დარეჯან ცხვიტარიამ
,,პრაიმტაიმი”
კომენტარები