“ნარკოტიკების შავი ბაზარი მართავს პროცესებს” – ზურაბ სიხარულიძე

ნარკოლოგი, “ფედერალისტების” ჯგუფის წევრი, ზურაბ სიხარულიძე:

ნარკობაზარი სრულად არის უკონტროლო.

შავი ბაზარი მართავს პროცესებს, სახელმწიფო კი ან ვერ ხედავს, ან არ უნდა დაინახოს.

2000-ზე მეტი ნარკორეალიზატორი ქუჩაში, „ხელიდან ხელში“ ვაჭრობა, მიწაში დამარხული ტონები ნივთიერებების — და თქვენ ისევ გვიყვებით „რეფორმებზე“?!

ეს რეფორმა კი არა, კაპიტულაციაა!

გაანალიზეთ, ბოლოს და ბოლოს, რა ტრიალებს შავ ბაზარზე! გაახილეთ თვალები!

ინტრავენური მოხმარება დომინირებს.

უმძიმესი, მაღალტოქსიკური ოპიატები თავისუფლად ტრიალებს.

ზედოზირება, აივ, C ჰეპატიტი და კრიმინალი უკვე „ნორმად“ აქციეთ!

და ამ ყველაფრის საპასუხოდ გვთავაზობთ 20 ადგილიან სავალდებულო მკურნალობას?!

ეს არაა პოლიტიკა — ეს არის იმიტაცია და ცინიზმი.

სანამ მოთხოვნა არ შემცირდება, ეს კატასტროფა არ გაჩერდება.

ყველაფერი დანარჩენი არის ფარსი და თვალის ახვევა.

მოთხოვნები — დაუყოვნებლივ:

1. მოთხოვნის შემცირება უნდა გამოცხადდეს მთავარ სახელმწიფო პრიორიტეტად.

არა სიტყვებით — რეალური რესურსით, ბიუჯეტით და ვადებით.

2. ზიანის შემცირების პროგრამების მკვეთრი გაფართოება.

არასაკმარისი მოცულობები კლავს ადამიანებს. ეს არის სიცოცხლის გადარჩენის მინიმუმი, არა ლიბერალური ახირება.

3. შავი ბაზრის მუდმივი მონიტორინგი და ნივთიერებების ანალიზი.

დღეს სახელმწიფომ არც კი იცის, რა ტრიალებს ქვეყანაში — ეს პროფესიული სირცხვილია.

4. ამბულატორიული და ჩანაცვლებითი თერაპიის რეალური ხელმისაწვდომობა.

არა დეკლარაციები — რეალური წვდომა, რეგიონებში, დაუყოვნებლივ.

5. სავალდებულო მკურნალობის იმიტაციის შეწყვეტა.

ეს არ ამცირებს მოთხოვნას, არ ამცირებს სიკვდილიანობას და არ მუშაობს — ფაქტია.

6. აივ/ჰეპატიტების ეპიდემიის აღიარება, როგორც ნარკოპოლიტიკის ჩავარდნის შედეგი.

და შესაბამისი საგანგებო რეაგირება.

თუ ამას არ გააკეთებთ, პასუხისმგებლობა თითოეულ ზედოზირებაზე, თითოეულ ინფიცირებაზე და თითოეულ დაღუპულ ახალგაზრდაზე ეკისრება სწორედ ამ პოლიტიკის ავტორებს.

დრო აღარ არის.

თვითტკბობა უნდა დასრულდეს.

გადაწყვეტილებები უნდა იყოს სწრაფი, მტკივნეული და რადიკალური.