„ნამახვანჰესის“ მოწინააღმდეგეები 16:00 საათიდან მსვლელობას და პიკეტს გეგმავენ. გეგმების შესახებ 24 მაისს, აქციაზე ერთ-ერთმა ორგანიზატორმა ვარლამ გოლეთიანმა განაცხადა.
მისი თქმით, არ გაჩერდებიან, ვიდრე შედეგს არ მიაღწევენ.
„25 მაისს, 16:00 საათიდან ისევ იქნება მსვლელობა, რომელიც მნიშვნელოვანი ადგილების პიკეტირებას მოახდენს, ამიტომ მოვუწოდებთ დედაქალაქის მოსახლეობას, რომ არ გავჩერდეთ იქამდე, ვიდრე მივაღწევთ შედეგს. მთავარია ბოლომდე მივიყვანოთ ეს ბრძოლა. ხელისუფლება მუდმივად ფიქრობს, როდემდე შეძლებს ეს ხალხი ამ ფორმით იბრძოლოს, ჩვენ უკვე 210-ე დღეა ვიბრძვით და ვიბრძოლებთ იქამდე, ვიდრე არ მივიღებთ შედეგს.
25 მაისს, 16:00 საათზე ვაჩვენებთ გაცილებით მეტ ძალას ვიდრე ვართ დღეს წარმოდგენილი. გაცილებით უფრო მეტნი ვიქნებით თუნდაც ამ მოედანზე, დავიძრებით მსვლელობით და გადავკეტავთ მნიშვნელოვან ადგილებს, მოვაწყობთ პიკეტირებას და ეს პროცესი გაგრძელდება, სანამ არ დაკმაყოფილდება ქართველი ხალხის მოთხოვნა, რომელიც გავაჟღერეთ არაერთგზის”, –აღნიშნა ვარლამ გოლეთიანმა 24 მაისის აქციაზე.
შედგება თუ არა შეხვედრა ხელისუფლებასა და აქციის ორგანიზატორებს შორის, ჯერჯერობით ცნობილი არ არის. მხარეები ამისთვის მზად არიან, თუმცა რიონის ხეობის მცველები შეხვედრაზე რამდენიმე ათეული აქტივისტის დაშვებას მოითხოვენ. “რიონის ხეობის გადარჩენისთვის” დამფუძნებელი მარიტა მუსელიანის ინფორმაციით, ხელისუფლების მხრიდან შეხვედრის მცდელობა არ ჩანს.
“პიკეტირების მცდელობები გვექნება. ის, რომ ყურადღება გამახვილდეს, ამ თვალსაზრისით და თბილისი ჩაერთოს ამ პროცესში, ჩვენი მიზანი ამ წუთას ეს არის. ჩვენ ვართ ამ პროტესტში და ვხედავთ, რომ აქვს გარკვეული შედეგი. სხვა თვალსაზრისით ჩვენ შედეგამდე ვერ მივედით, ეს სამწუხაროა ძალიან. ხელისუფლებაში მყოფი ადამიანისთვის, ან მაღალი პოლიტიკური პასუხისმგებლობის პირისთვის პრობლემა არ უნდა იყოს თავის მოსახლეობასთან შეხვედრა. არანაირი შემოთავაზება ან დიალოგის მცდელობა არ არის,” – აცხადებს მარიტა მუსელიანი.
შეგახსენებთ, „ნამახვანჰესის“ მშენებლობის წინააღმდეგ პროტესტის მონაწილეთა ნაწილმა ღამე რესპუბლიკის მოედანზე გაათენა, სადაც კარვებია გაშლილი
კომენტარები