ანი დვალიშვილი
ვერ გეტყვით, ვინ და რატომ გადაწყვიტა, მაგრამ ფაქტია – 90-მილიონიან ირანში საქართველოდან ყველაზე მეტი ხე-ტყე შედის. თუ გახსოვთ, ერთი პერიოდი, საქართველოს მთელი სპილენძი და ალუმინი თურქეთში რომ გავზიდეთ და საბოლოოდ, ისეთი დეფიციტი დაგვიდგა, რომ საყდრისის საბადოს იმედად დავრჩით, საიდანაც ძირითადად სწორედ სპილენძი ამოდის (და არა ოქრო) და მას ვყიდით, სანაცვლოდ კი… სანაცვლოდ, იმავე თურქეთიდან შემოტანილი მავთულით კეთდება საქართველოში, პრაქტიკულად, ყველაფერი. ვიღაცას შესაძლოა სპილენძის გატანა სასაცილოდ მოეჩვენოს, მაგრამ 44 მილიონი დოლარის გავიდა წელს და ერთი ამდენი კიდევ გავა. ამ ყველაფერს კი იმიტომ გიყვებით, რომ საქართველოდან ირანში ძალიან, ძალიან დიდი რაოდენობით ხე-ტყე იგზავნება. არ აქვს მნიშვნელობა, ხის მასალა გამომშრალია თუ ნედლი, მთავარია, მოჭრილი და დახერხილი იყოს და მიაქვთ ყველაფერი, რისი წაღებაც შეიძლება და რაჭა-ლეჩხუმი-ქვემო სვანეთის მიმართულებით, ისეთი ჭრა-ხერხვაა გაჩაღებული, არცერთ დამპყრობელს რომ არ უქნია.
„პრაქტიკულად, ყოველ კვირა ცხადდება ახალი აუქციონები ტყის ჭრაზე, იგებენ კონკრეტული პირები, მაგრამ რეალურად, მთელი ამ ბიზნესის უკან, ერთადერთი კაცი დგას. რატომ არ გეუბნებით მის სახელს? მეშინია და იმიტომ, ყველამ იცის, სხვას ჰკითხეთ“,-გვითხრა ადგილობრივმა და ისიც დააყოლა, ზემოდან რომ გადაუფრინოთ ტყეებს, შუაგულ, გაუვალ ადგილებში, მინდვრებია გაკეთებული, იმდენი ხე მოიჭრაო.
გავარკვიეთ კუბური მეტრის ფასიც – 500 დოლარი ადგილზე და ტრანსპორტირებაც დამკვეთისაა, ანუ მთავარია ხის მასალა იყოს და 500 დოლარს უპრობლემოდ იხდის ყველა, მაგრამ ყველას არ აძლევენ, კონკრეტული პირის ნებართვა გჭირდებათო, მაგრამ ამ კონკრეტული პირის საკონტაქტო ნომერი არავინ მოგვცა. საუბარი ყოველდღიურად რამდენიმე მილიონ დოლარზეა (და არა ლარზე), თუმცა ტყის მჭრელებიც აღიარებენ, რომ ეკოლოგიური კატასტროფის წინაშე ამ ტემპებით 2 წელიწადში მივალთ. სამასალე ხეს ვინ ჩივის, 2 წელიწდში რეგიონს შეშის პრობლემა დაუდგება, თუმცა…
„მუშებს დღეში 150-დან 200 ლარამდე უხდიან და საზღვარგარეთ წასვლას და მუშაობას, აქ ურჩევნიათ. ისინი თუ უარს იტყვიან, სხვას ნახავენ, ბოლოს და ბოლოს, ისევ იმ ირანელებს ამოიყვანენ და იმათ ამუშავებენ. ნამახვანჰესი რომ არ ააშენებინეს, აქაოდა, ტყეს არ მივცემთ 49 წლით სხვასო, ახლა მისაცემიც არაფერი დარჩება“,-ესეც ადგილობრივებმა გვითხრეს. თამამად ვამბობთ, რომ აღნიშნული სიტუაციის შესახებ, მთავრობის აბსოლუტურად ყველა წევრმა იცის და თუ გაიგებთ, რომ რომელიმემ გააპროტესტა, ჩვენც გვითხარით. ჰო, ეს ყველაფერი სექტემბრისთვის ერთ-ერთი მინისტრის პორტფელს რომ შეიწირავს, დანარჩენი მერე ვთქვათ და ამ მინისტრს იმიტომ კი არ მოხსნიან, რომ ხელისუფლების აზრით რამეს აშავებს, უბრალოდ ჩათვლიან, რომ მან საკმარისზე მეტი იშოვა და ეყოფა.
კომენტარები