“ნახევრადშეშლილმა დიქტატორმა რუსეთი კოლაფსამდე მიიყვანა” – მელაშვილი

ყოფილი პარლამენტარი, ირაკლი მელაშვილი:

დღეს მნიშვნელოვანი და ძალიან სიმბოლური თარიღია. 1418 დღე შესრულდა რუსეთ – უკრაინის ომის დაწყებიდან, ანუ, ზუსტად იმდენი, რამდენიც გრძელდებოდა სსრკ-ს “დიდი სამამულო ომი” ჰიტლერული გერმანიის წინააღმდეგ. (1941 წლის 22 ივნისი -1945 წლის 9 მაისი).

1418 დღეში სსრკ-მ ჯერ უკან დაიხია, მერე შეუტია, გერმანელებისგან გაანთავისუფლა რუსეთის ევროპული ნაწილის, უკრაინის, ბელარუსის, მოლდოვის, ბალტიის რესპუბლიკების ტერიტორიები, გერმანელები გაყარა მთელი აღმოსავლეთ და ცენტრალური ევროპის ქვეყნების, პოლონეთის, ჩეხოსლოვაკიის, რუმინეთის, ბულგარეთის, ავსტრიის და იუგოსლავიის ტერიტორიებიდან, შევიდა გერმანიაში, აიღო ბერლინი და მოკავშირეებთან ერთად დაამარცხა გერმანია.

იგივე 1418 დღეში რუსეთმა ვერ შეძლო დონეცკის ოლქის განთავისუფლებაც კი, მიუხედავად იმისა, რომ უკრაინაზე სამხედრო თავდასხმამდე, ამ ოლქის ტერიტორიის ნახევარზე მეტს აკონტროლებდა .

ამ ომის გამო რუსეთამ პოლიტიკურად და ეკონომიკურად რა შედეგი მიიღო ამაზე იმდენი მაქვს დაწერილი, რომ აქ თავს აღარ შეგაწყენთ, უბრალოდ ერთს დავამატებ, თუკი გადავხედავთ 2025 წლის ბოლოს რუსეთი ეკონომიკის მონაცემებს, ვისაც ოდნავ აზროვნება მაინც შეუძლია, ის იოლად მიხვდება, რომ ქვეყნის სათავეში მდგომმა ნახევრად შეშლილმა დიქტატორმა რუსეთი ფაქტობრივად კოლაფსამდე მიიყვანა.

პოლიტიკურად რუსეთი იქცა სრულ კეთროვანად დემოკრატიული სამყაროსთვის. მისი ავტორიტეტი პლინტუს ქვემოთაა დაცემული. რუსეთმა დაიწყო იმ დიქტატორი მოკავშირეების დაკარგვაც, რომელთა ტირანიული რეჟიმის შენარჩუნებაში პუტინის ხელისუფლებას ათობით მილიარდი დოლარი აქვს გადაყრილი და რომლებიც მის მთავარ დასაყრდენს წარმოადგენდენ დასავლეთის წინააღმდეგ ბრძოლაში.
პუტინის სტარტეგიული პარტნიორები, სირიის ლიდერი ბაშარ ასადი ისე დაამხეს და ვენესუელის ლიდერი ამრიკელებმა ისე დაატყვევეს, რომ რუსებმა რეალურად ხმის ამოღებაც კი ვერ გაბედეს. იმედია მათ რიცხვს მალე ირანი და კუბა შეემატება.

ამერიკელები საერთაშორისო წყლებში ერთი მეორის მიყოლებით დაუსჯელად აპატიმრებენ მსოფლიო ერთ-ერთი სამხედრო პოლიტიკური ლიდერობის პრეტენზიის მქონე ქვეყნის ტანკერებს. რუსეთის დროშის ქვეშ მცურავი გემების დასაცავად პუტინის მიერ წარგაზვნილი, მათთან ერთად მცურავი რუსული წყალქვეშა ნავები და სამხედრო გემები კი ისე ტრიალდებიან და ტოვებენ “ინციდენტის” ადგილებს, რომ არც კი ფიქრობენ, ან რუსული დროშის, ან ქვეყნის ავტორიტეტის და ღირსების დაცვას.

რუსეთ-უკრიანის ომში პუტინი წარმატებით ამსხვრევს კიდევ ერთი დიდ მითს, ხმელეთზე რუსეთის არმიის სამხედრო უძლეველობის შესახებ. პუტინის რეჟიმის რეალურ სამხედრო სიძლიერესა და მისი მთავარსარდლის “გენიაზე” ყველაზე კარგად ერთი უპრეცენდენტო ფაქტი მეტყველებს, რუსის ჯარმა დონეცკიდან პოკროვსკამდე (ეს პატარა ქალაქი რუსებს ჯერ კიდევ არ აუღიათ!) 55 კილომეტრის (შეგიძლიათ დაგუგლოთ და ნახავთ, რომ ამდენია!) გავლას 3 წელი მოანდომა და ამ “წარმატების” მიღწევას 300 ათასი ჯარისკაცი შეაკლა.

ეს რაც ზემოთ დავწერე, შეფასება არაა, უბრალოდ ფაქტებია. ჰოდა ამ ფაქტების შემხედვარე, ვინც კიდევ პუტინის გენიოსობასა და რუსების უძლეველობაზე დაიწყებს საუბარს, ის, ჩემი აზრით, პირდაპირ ფსიქიატრიულ დისპანსერში უნდა გაუშვა სამკურნალოდ.

რუსეთის იმპერიის დამასამარებელ უკრაინას, მის ხალხს და მის არმიას კი ჩემი თანადგომა და პატივისცემა!

«Сла́ва Украи́не! Геро́ям сла́ва!»